ლონდონის სიტის ლორდ მერმა ენდრიუ პარმლიმ საგარეო საქმეთა მინისტრთან, მიხეილ ჯანელიძესთან შეხვედრისას განაცხადა, რომ საქართველო რეგიონში ერთ-ერთი ყველაზე ხელსაყრელი ქვეყანაა ბიზნესის წარმოების კუთხით. შეხვედრაზე განხილული საკითხების შესახებ ინფორმაციას საგარეო საქმეთა სამინისტრო ავრცელებს.

"საქართველოსა და გაერთიანებულ სამეფოს შორის თანამშრომლობის დიდი პოტენციალი არსებობს. ვიმედოვნებ, რომ მსგავსი დიალოგი ჩვენ ქვეყნებს შორის რეგულარულ ხასიათს მიიღებს, რაც ხელს შეუწყობს ბიზნესკავშირების განვითარებას. საქართველო რეგიონში ერთ-ერთი ყველაზე ხელსაყრელი ქვეყანაა ბიზნესის წარმოების კუთხით", - აღნიშნა ენდრიუ პარმლიმ.

მანსონ ჰაუსში გაიმართა მრგვალი მაგიდა ბრიტანული ბიზნესის წარმომადგენლებისთვის. შეხვედრა საქართველოს ეკონომიკურ განვითარებასა და საინვესტიციო შესაძლებლობებს დაეთმო.

ლონდონის სიტის ლორდ მერის განცხადებით, მრგვალი მაგიდა აღნიშნულ ორგანიზაციაში პირველი მსგავსი ტიპის ღონისძიებაა. მისი თქმით, მისი საქმიანობის მთავარი პრიორიტეტი სწრაფად განვითარებად ქვეყნებთან თანამშრომლობაა.