დიდი ბრიტანეთის ხაზინის სანქციების ოფისმა რუსეთის სამხედრო მანქანის წინააღმდეგ დაწესებული სანქციების სია გააფართოვა. ოფიციალური გადაწყვეტილებით, სანქცირებულთა სიაში მოხვდა სამი კომპანია, რომლებიც საქართველოში არიან რეგისტრირებული.

ბრიტანეთის მთავრობის ვებგვერდზე განთავსებული დოკუმენტის თანახმად, სანქციები დაუწესდათ შემდეგ ქართულ იურიდიულ პირებს: Arvix LLC-ს (შპს არვიქს), Rapira Group LLC-სა (შპს რაპირა გრუპ) და Aifory LLC-ს (შპს ეიაიფორი). BMG წერს, რომ საქართველოს ბიზნეს რეესტრის მონაცემებით, დასახელებულ მესაკუთრეებს ქვეყანაში სხვა ბიზნესები არ ეკუთვნით.

შპს არვიქს (Arvix LLC): რეგისტრირებულია 2023 წლის 26 ოქტომბერს. მისი დირექტორი და 100%-იანი წილის მფლობელია თამაზ გარაევი.

შპს რაპირა გრუპ (Rapira Group LLC): რეგისტრირებულია 2022 წლის 9 ნოემბერს. ამჟამად კომპანია იმყოფება ლიკვიდაციის რეჟიმში (განაცხადი რეესტრში 13 მაისს დარეგისტრირდა), ხოლო მის მესაკუთრედ და ლიკვიდატორად მითითებულია ბრიტანეთის მოქალაქე ილიას აჰაევი.

შპს ეიაიფორი (Aifory LLC): რეგისტრირებულია 2023 წლის 23 ივნისს. მისი დირექტორი და 100%-ის მფლობელია მიხაელ გევორქიანი.

სანქციების გადაწყვეტილების თანახმად, ეს კომპანიები მართავენ რუსეთზე ორიენტირებულ ბირჟებს სანქციებისგან თავის არიდების მიზნით და დაკავშირებული არიან რუსულ კრიპტო გაცვლის ქსელ A7 network-თან.

"A7 ქსელი კრემლის მიერ მხარდაჭერილი სისტემაა, რომელიც შექმნილია დასავლური სანქციების გვერდის ავლისთვის, სამხედრო შესყიდვების დასაფინანსებლად და ნავთობის გაყიდვიდან მიღებული თანხების საბრუნავად. ქსელი აცხადებს, რომ გასულ წელს 90 მილიარდ დოლარზე მეტის ბრუნვა ჰქონდა — რაც დაახლოებით რუსეთის წლიური სამხედრო ხარჯების ნახევარს შეადგენს", — ნათქვამია ბრიტანეთის მთავრობის განცხადებაში.

სანქციების ძირითადი ნაწილი კრიპტოვალუტების გაცვლის იმ რუსულ სისტემებს უკავშირდება, რომლებიც საქართველოდან, დიდი ბრიტანეთიდან, ყირგიზეთიდან, არაბთა გაერთიანებული საამიროებიდან, პანამიდან და სალვადორიდან ოპერირებდნენ. ახალი ზომები სულ 18 კომპანიასა და პირს შეეხო. დიდი ბრიტანეთის განცხადებით, ეს ჯგუფი იყენებს ყირგიზულ ბანკს, რომელიც ეჭვმიტანილია ქსელისთვის გადახდების ხელშეწყობაში, ასევე მსხვილ გლობალურ კრიპტოვალუტის ბირჟას, რომლითაც, სავარაუდოდ, 1.5 მილიარდ დოლარზე მეტი კრემლის სალაროში ჩაირიცხა.

დიდი ბრიტანეთის საგარეო საქმეთა მინისტრმა, ივეტ კუპერმა განაცხადა, რომ ლონდონი არ დაუშვებს სანქციებისთვის გვერდის ავლას ჩრდილოვანი ფინანსური სისტემების გამოყენებით.

"ჩვენ ვპოულობთ და ვხურავთ ფინანსურ წყაროებს, რომლებიც ასაზრდოებს პუტინის სამხედრო მანქანას. უსაფრთხო თავშესაფარი არ იარსებებს მათთვის, ვინც ხელს უწყობს რუსეთის აგრესიას", — განაცხადა ივეტ კუპერმა.