"სამწუხაროდ, საკანონმდებლო ცვლილებებთან დაკავშირებული მიზეზების გამო, 2026 წლის ივნისიდან "კლუბი სინერგია" ვეღარ შეძლებს უფასო მომსახურების გაგრძელებას" — წერს ფონდის "გლობალური ინიციატივა ფსიქიატრიაში — თბილისის" მიერ შექმნილი ფსიქოსოციალური მხარდაჭერის სივრცე, რომელიც ევროკავშირის მხარდაჭერით დაარსდა.
ინფორმაციას ამის შესახებ კლუბი სოციალურ ქსელში ავრცელებს.

როგორც ორგანიზაცია განმარტავს, გადაწყვეტილება საკანონმდებლო ცვლილებებთან დაკავშირებული მიზეზებით არის განპირობებული, თუმცა, ამასთან, აცხადებენ, რომ მათი მისია და ღირებულებები უცვლელი რჩება და მომავალში საფასურის გარეშე მომსახურების ნაწილობრივი შენარჩუნების იმედიც აქვთ.

"2019 წელს, ევროკავშირის მხარდაჭერით, ფონდმა "გლობალური ინიციატივა ფსიქიატრიაში – თბილისი" შექმნა "კლუბი სინერგია" — სივრცე, რომელიც წლების განმავლობაში უფასო, მტკიცებულებაზე დაფუძნებულ, ფსიქოსოციალურ დახმარებას უწევს 14-25 წლის ახალგაზრდებსა და მათ ოჯახებს.

სამწუხაროდ, საკანონმდებლო ცვლილებებთან დაკავშირებული მიზეზების გამო, 2026 წლის ივნისიდან "კლუბი სინერგია" ვეღარ შეძლებს უფასო მომსახურების გაგრძელებას.

ეს ძალიან მძიმე და გულდასაწყვეტი რეალობაა მთელი გუნდისთვის.

შვიდი წლის შემდეგ, კლუბი სინერგიის გუნდი ფასიან სერვისზე გადადის, თუმცა ჩვენი მისია და ღირებულებები უცვლელი რჩება — ხარისხიანი, გულისხმიერი მომსახურება უკეთესი ფსიქიკური ჯანმრთელობისთვის.

მადლობას ვუხდით ყველა მოზარდსა და ახალგაზრდას, ოჯახს და პარტნიორს ნდობისა და თანამშრომლობისთვის. თითოეულ თქვენთაგანთან ურთიერთობა ჩვენთვის მნიშვნელოვანი და გამზრდელი იყო და რჩება.

იმედს ვიტოვებთ, რომ თანდათან შევძლებთ — საფასურის გარეშე — კლიენტების შეზღუდულ რაოდენობას მაინც მოვემსახუროთ.

სინერგიის მომსახურების ახალ პირობებს მალე შემოგთავაზებთ", — წერია განცხადებაში.