კონგოს დემოკრატიული რესპუბლიკის (კდრ) ოფიციალური პირების განცხადებით, ქვეყანაში ებოლას აფეთქების შედეგად სულ მცირე 131 გარდაცვალების შემთხვევა დაფიქსირდა, ხოლო საეჭვო შემთხვევების რაოდენობა 513-ს აჭარბებს. ამის შესახებ ინფორმაციას BBC ავრცელებს.

კდრ-ის მთავრობის წარმომადგენელმა აღნიშნა, რომ ინფიცირების შემთხვევები ახლა უკვე უფრო ფართო გეოგრაფიულ არეალში ვლინდება. აშშ-ის დაავადებათა კონტროლისა და პრევენციის ცენტრის (CDC) ინფორმაციით, ორი დადასტურებული შემთხვევა და ერთი გარდაცვალება მეზობელ უგანდაშიც დაფიქსირდა.

ჯანდაცვის მსოფლიო ორგანიზაციამ (WHO) ებოლას ამჟამინდელი შტამის აფეთქება, რომელიც ბუნდიბუგიოს ვირუსითაა გამოწვეული, საერთაშორისო მნიშვნელობის საგანგებო მდგომარეობად გამოაცხადა.

მიუხედავად იმისა, რომ ვირუსი სწრაფად ვრცელდება, კონგოს მთავრობა მოსახლეობის დამშვიდებას ცდილობს და აცხადებს, რომ რეაგირების ჯგუფები აქტიურად მუშაობენ საეჭვო კონტაქტების გამოსავლენად და პანიკის საფუძველი არ არსებობს. თუმცა, საზოგადოებაში შეშფოთება სულ უფრო იზრდება.

BBC წერს, რომ ინფიცირებულთა შორის არის ამერიკელი ექიმიც, რომელიც კონგოში მუშაობდა. აღნიშნული ინფორმაცია დაავადებათა კონტროლის ცენტრმა და იმ სამედიცინო-მისიონერულმა ჯგუფმა დაადასტურეს, რომელთანაც ექიმი თანამშრომლობდა. მას მკურნალობის კურსის გასავლელად გერმანიაში გადაიყვანენ.

ვირუსის შემდგომი გავრცელების თავიდან ასაცილებლად, WHO მეზობელ ქვეყნებს მოუწოდებს, გააძლიერონ სასაზღვრო კონტროლი და მზადყოფნა. რუანდამ უკვე განაცხადა კონგოსთან საზღვარზე შემოწმების გამკაცრების შესახებ, ხოლო ნიგერია აღნიშნავს, რომ ყურადღებით აკვირდება სიტუაციას.