"სიძულვილის ენის თუ ზიზღის ენის გამოყენება ჩვენი ქვეყნის უსაფრთხოების საკითხია," — შალვა პაპუაშვილი ახალი სამმართველოს შექმნის შესახებ მამუკა მდინარაძის მიერ გაკეთებულ განცხადებას გამოეხმაურა, რომელიც საჯარო სივრცეში სიძულვილის ენას, შეურაცხმყოფელ კამპანიებსა და აგრესიულ კომუნიკაციას მონიტორინგს გაუწევს.

პაპუაშვილის თქმით, სიძულვილის ენა საზოგადოების დაპირისპირებისა და ქვეყნის არევის ინსტრუმენტად გამოიყენება.

"უნდა გავიაზროთ, რომ ეს არ არის მხოლოდ ესთეტიკის საკითხი, რომ სიძულვილის ენის თუ ზიზღის ენის გამოყენება ხდება. ეს არის ჩვენი ქვეყნის უსაფრთხოების საკითხი. ვინაიდან სიძულვილის და ზიზღის წაქეზება და დათესვა, ვატყობთ, რომ ეს არის ერთ-ერთი მთავარი იარაღი, რაც ჩვენი ქვეყნის არაკეთილმოსურნეებს შერჩათ ხელში.

სწორედ ამ ინსტრუმენტს იყენებენ ქვეყნის ასარევად — შუღლის შემოტანას, სიძულვილის შემოტანას, იმისთვის, რომ შემდეგ, გადაკიდონ ადამიანები ერთმანეთს, არიონ ქვეყანა და არეულ ქვეყანაში, შემდეგ, თავის სასარგებლო შედეგებს მიაღწიონ.

ამიტომ, სიძულვილის და ზიზღის ენა, ეს არ არის მხოლოდ ესთეტიკის საკითხი, არ არის მხოლოდ ემოციების საკითხი, — ეს არის სახელმწიფო უსაფრთხოების საკითხი, ვინაიდან ამ მეთოდს იყენებენ უცხო ქვეყნის სპეცსამსახურების წიგნებიდან გადმოწერით, იყენებენ ჩვენი ქვეყნის შიდა პოლიტიკაზე გავლენის მოსახდენად, საზოგადოებაში დაბნეულობის შესატანად და ადამიანების ერთმანეთის წასაკიდებლად, ამიტომ მნიშვნელოვანია, რომ სახელმწიფომ პროაქტიულად, თავის ხელში აიღოს ჩვენს ქვეყანაზე ამგვარი ინსტრუმენტების გამოყენებისთვის ხელის შეშლა," — განაცხადა პაპუაშვილმა.

სიძულვილის ენის პრევენციასთან დაკავშირებით დასმულ კითხვაზე პაპუაშვილმა აღნიშნა, რომ საზოგადოებრივი ცხოვრება "ქართულ ფასეულობებს" უნდა დაუბრუნდეს.

"სამწუხაროდ, ჩვენ ბრიუსელის ფასეულობებს ვხედავთ სადამდეც მივყავართ, იმიტომ, რომ ზიზღის ენა, სწორედ იქედან არის წაქეზებული. ჩვენ ვხედავთ, რომ რამდენიმე ელჩი არის, რომელიც ამ საქმეში ჩართულია საქართველოში, ვხედავთ ევროპარლამენტარებს, რომლებიც ზიზღის ენით არიან ჩართულნი," — თქვა მან.

ცნობისთვის, სამართალდამცავ სტრუქტურებს შორის კოორდინაციის საკითხებში სახელმწიფო მინისტრის, მამუკა მდინარაძის ბრიფინგიდან ცნობილი გახდა, რომ შინაგან საქმეთა სამინისტროში შეიქმნება სამმართველო, რომელიც საჯარო სივრცეში სიძულვილის ენას, შეურაცხმყოფელ კამპანიებსა და აგრესიულ კომუნიკაციას მონიტორინგს გაუწევს და შესაბამის სამართლებრივ რეაგირებას იქონიებს. ეს შეეხება ნებისმიერი ტიპის საჯარო კომუნიკაციას.