სოციალური სამართლიანობის ცენტრი ეხმაურება დარბაზის ხეობაში სავარაუდოდ, მინერალური რესურსების მოპოვების მიზნით წარმოებულ სამუშაოებს და განცხადებას ავრცელებს, სადაც ნათქვამია, რომ "ეს შემთხვევა გარემოსდაცვით სფეროში გადაწყვეტილების მიღების პროცესის ხარვეზულობის და ადგილობრივი მოსახლეობის უგულებელყოფის ტენდენციის მორიგი გამოვლინებაა".

ორგანიზაციის თქმით, როგორც ადგილობრივები აცხადებენ, სამუშაოები მოსახლეობის წინასწარი ინფორმირების გარეშე დაიწყო.

"სოციალური სამართლიანობის ცენტრი ეხმაურება დარბაზის ხეობაში სავარაუდოდ, მინერალური რესურსების მოპოვების მიზნით წარმოებულ სამუშაოებს და მიგვაჩნია, რომ ეს შემთხვევა გარემოსდაცვით სფეროში გადაწყვეტილების მიღების პროცესის ხარვეზულობის და ადგილობრივი მოსახლეობის უგულებელყოფის ტენდენციის მორიგი გამოვლინებაა.

ადგილობრივები აცხადებენ, რომ სამუშაოები ისე დაიწყო, მოსახლეობისთვის წინასწარ ინფორმაცია არავის მიუწოდებია. მათი თქმით, სოფელში პროტესტის დაწყება მას შემდეგ მოუხდათ, რაც ტექნიკა უკვე ტერიტორიაზე მუშაობდა. მათთვის ამ დრომდე არ არის ცნობილი რა მასშტაბის და რა ტიპის სამუშაოების ჩატარებას აპირებს კომპანია მათ სოფლებში.

დარბაზის ხეობაში მიმდინარე მოვლენები კიდევ ერთხელ ააშკარავებს იმ სისტემურ და ფუნდამენტურ ჩავარდნებს, რომლებიც გარემოსდაცვით საკითხებზე გადაწყვეტილების მიღების პროცესს ახასიათებს საქართველოში. ეს ჩავარდნები არ შემოიფარგლება მხოლოდ ერთი სექტორით და თანაბრად პრობლემურია წიაღისეულის მოპოვების, ენერგეტიკული და ინფრასტრუქტურული პროექტების, ურბანული განვითარების და დაცული ტერიტორიების მართვის თაობაზე სხვადასხვა უწყებების მიერ გადაწყვეტილებების მიღებისას, რომლებიც ადგილობრივების უფლებების და ინტერესების სრული უგულებელყოფით წარიმართება.

ამდენად, ამ დროისთვის ჩვენთვის ხელმისაწვდომი ინფორმაციის საფუძველზე, აშკარაა, რომ მოპოვების მორიგი კერის ათვისების პროცესი გაუმჭვირვალედ, მოსახლეობის წინასწარი ინფორმირების გარეშე დაიწყო, რაც განსაკუთრებით პრობლემურია ეთნიკური უმცირესობებით დასახლებულ რეგიონში ენასთან და ენის პოლიტიკასთან დაკავშირებული გამოწვევების გათვალისწინებით. მნიშვნელოვანია, რომ უწყებებმა დროულად და ჯეროვნად უპასუხონ ხეობის მცხოვრებლების მიმართვას, წარმართონ სათანადო კომუნიკაცია ადგილობრივ მოსახლეობასთან და მისცენ მათ შესაბამის გადაწყვეტილებებზე გავლენის მოხდენის შესაძლებლობა. ასევე არსებითია ამ პროცესში გათვალისწინებული იყოს გარემოზე ზემოქმედების რისკების მინიმუმამდე დაყვანის ინტერესი და აგრარულ მეორნეობაში ჩართული სოფლის მოსახლეობის სასიცოცხლო ინტერესები ადგილობრივ რესურსებზე," — წერია განცხადებაში.

ცნობისთვის, ბოლნისის მუნიციპალიტეტში, დარბაზის ხეობაში, უკვე სამ კვირაზე მეტია მასშტაბური სამუშაოები მიმდინარეობს, რამაც ადგილობრივი მოსახლეობის პროტესტი გამოიწვია. მძიმე ტექნიკის მუშაობის მიუხედავად, მოსახლეობა აცხადებს, რომ არც ადგილობრივ თვითმმართველობას და არც სამინისტროებს მათთვის ინფორმაცია არ მიუწოდებიათ.

• "სოფლის ბუნებას ჩვენგან მალულად ანადგურებენ" — ბოლნისში, დარბაზის ხეობის მოსახლეობა მძიმე ტექნიკის სამუშაოებს აპროტესტებს