ბოლნისის მუნიციპალიტეტში, დარბაზის ხეობაში, უკვე ორ კვირაზე მეტია მასშტაბური სამუშაოები მიმდინარეობს, რამაც ადგილობრივი მოსახლეობის პროტესტი გამოიწვია. მძიმე ტექნიკის მუშაობის მიუხედავად, მოსახლეობა აცხადებს, რომ არც ადგილობრივ თვითმმართველობას და არც სამინისტროებს მათთვის ინფორმაცია არ მიუწოდებიათ. ინფორმაციას NEWS.On.ge-ის რაბილ ისმაილი უზიარებს.

მის ცნობით, ადგილობრივები ეჭვობენ, რომ ხეობაში ოქროს, ვერცხლის ან სხვა ლითონების მოსაპოვებლად მოსამზადებელი სამუშაოები ტარდება. მათი თქმით, პროცესის გასაიდუმლოება კანონის დარღვევაა.

"ეს სამუშაოები ხალხის სასარგებლოდ რომ ტარდებოდეს, დარწმუნებულნი ვართ, სახელმწიფო უწყებები და პოლიტიკოსები ამას ფართოდ გააშუქებდნენ. რეალობა კი ისაა, რომ სოფლის ბუნებას ჩვენგან მალულად ანადგურებენ," — აცხადებენ ადგილობრივები.

მიუხედავად იმისა, რომ გარემოსდაცვითი ზედამხედველობის დეპარტამენტი საჩივრის პასუხად სამუშაოების ლიცენზიაზე მიუთითებს, მოქალაქეები აღნიშნავენ, რომ ოფიციალურ სახელმწიფო რესურსებზე დარბაზისა და მიმდებარე სოფლების შესახებ ნებართვები არ იძებნება.

მოსახლეობა ამ მოვლენებს ბოლო 15 წლის განმავლობაში მიმდინარე ეკოლოგიური დეგრადაციის გაგრძელებად მიიჩნევს. რეგიონში არსებული სამთო-მოპოვებითი სამუშაოების ფონზე, ადგილობრივები ორ ძირითად საფრთხეს გამოყოფენ:

  • ჯანმრთელობის რისკები: ქვემო ქართლი საქართველოში ონკოლოგიური
    დაავადებების ერთ-ერთ ეპიცენტრად იქცა.

  • დაბინძურება: 16 წლის წინ გერმანული ფონდების მიერ ჩატარებული კვლევის
    შედეგად, ბოლნისში მოყვანილი 15 დასახელების ბოსტნეული მძიმე მეტალების
    მატარებლად იქნა მიჩნეული.

ადგილობრივები იუწყებიან, რომ დარბაზის ხეობა, რომელიც აერთიანებს სოფლებს: დარბაზი, დემირლი (ხახალაჯვარი),სარიმადლი (ჭრეში), ქვემო გულავერი (გეტა), ზემო გულავერი (წიფორი) დაბაბაკიშილარი (ფოცხვერიანი), ამჟამად დიდი საფრთხის ქვეშაა. ადგილობრივი
მოსახლეობა მოუწოდებს ადგილობრივ და საერთაშორისო ორგანიზაციებსა და
მედიას, დაინტერესდნენ აღნიშნული საკითხით.