"ბოლო წლებში ქართულმა ოცნებამ სცადა, ქვიარ ადამიანები საჯარო სივრცეებიდან და საზოგადოებრივი ცხოვრებიდან გავექრეთ" — 17 მაისს, ჰომოფობიასთან, ბიფობიასა და ტრანსფობიასთან ბრძოლის საერთაშორისო დღესთან დაკავშირებით Tbilisi Pride სოციალურ ქსელში განცხადებას ავრცელებს.

მათი თქმით, ეს დღე ქვიარ ადამიანების მედეგობაზე, წინააღმდეგობასა და ურთიერთზრუნვაზე საუბრის შესაძლებლობაა.

"17 მაისს, ჰომოფობიასთან, ბიფობიასა და ტრანსფობიასთან ბრძოლის საერთაშორისო დღეს, გვინდა ვისაუბროთ ქვიარ ადამიანების მედეგობაზე, ხანგრძლივ წინააღმდეგობასა და ურთიერთზრუნვაზე.

მიუხედავად ძალადობის, დევნისა და ჩაგვრისა, ქვიარ ადამიანები კვლავ ვქმნით სივრცეებს, სადაც ერთმანეთის დანახვა, სოლიდარობა და თავისუფლება შესაძლებელია. სათემო შეხვედრებზე, კლუბურ სივრცეებში, პროტესტის წინა ხაზებზე თუ ემიგრაციაში — ყველგან ვცდილობთ, ერთმანეთი არ დავკარგოთ.

ქვიარ ადამიანებს ისტორიულად გვიწევდა მტრულ გარემოში არსებობა. ამიტომ ვიცით, როგორ გადავრჩეთ, როგორ დავეხმაროთ ერთმანეთს და როგორ შევინარჩუნოთ ადამიანურობა ყველაზე რთულ პირობებშიც.

2013 წლის 17 მაისს ქვიარ თემზე თავდასხმა ნათელი მაგალითია იმისა, რომ ძალადობა და ჩაგვრა ხელისუფლების პოლიტიკური ნება ყოველთვის იყო.

ჩვენს სხეულებზე იწვრთნებოდა ის ავტორიტარიზმი, რომელიც დღეს უკვე მთელი საზოგადოებისთვისაა ხილული.

ბოლო წლებში ქართულმა ოცნებამ სცადა, ქვიარ ადამიანები საჯარო სივრცეებიდან და საზოგადოებრივი ცხოვრებიდან გავექრეთ. გაძლიერდა სიძულვილი, ცენზურა და დევნა.

თუმცა, ყველაფრის მიუხედავად, უარს ვამბობთ სასოწარკვეთაზე.

ყოველი ავტორიტარული რეჟიმი წარმავალია.

ჩვენ ერთმანეთს ვინარჩუნებთ.

ზოგჯერ გადარჩენაც ბრძოლის ფორმაა. ჩვენი წინააღმდეგობა მხოლოდ უფლებებისთვის ბრძოლა არაა — ის სიყვარულიცაა, სიხარულიც და თავისუფლების სურვილიც," — წერია განცხადებაში.

ცნობისთვის, 17 მაისს მსოფლიოს 130-ზე მეტ ქვეყანაში ჰომოფობიასთან, ტრანსფობიასა და ბიფობიასთან ბრძოლის საერთაშორისო დღე აღინიშნება.

შეგახსენებთ, 2013 წლის 17 მაისს, ჰომოფობიასა და ტრანსფობიასთან ბრძოლის საერთაშორისო დღეს, თბილისში, პუშკინის სკვერში შეკრებილ ლგბტ თემის წევრებს სასულიერო პირების თანხლებით ათასობით ადამიანი დაუპირისპირდა. ისინი სექსუალური უმცირესობების წარმომადგენლებსა და აქტივისტებს სიტყვიერ და ფიზიკურ შეურაცხყოფას აყენებდნენ. შეხლა-შემოხლის დროს, რაზეც პოლიცია სათანადო რეაგირებას ვერ ახდენდა, აქციის რამდენიმე მონაწილე დაშავდა.

ადამიანის უფლებათა ევროპულმა სასამართლომ 2013 წლის 17 მაისს თბილისში ლგბტ დემონსტრანტების წინააღმდეგ მიმართულ ძალადობას "უპრეცედენტო" უწოდა და საქართველოს 193 500 ევროს გადახდა დააკისრა. სასამართლოს შეფასებით, აღნიშნული ძალადობა "ხელისუფლების მდუმარე თანხმობით" ჰომოფობიასა და ტრანსფობიასთან ბრძოლის საერთაშორისო დღეს განხორციელდა.