თბილისის არჩეული მერი კახა კალაძე მერიაში საკუთარ გუნდის წევრებს, ირაკლი ხმალაძეს, მაია ბითაძესა, ლაშა კვანტალიანსა და თემურ ბოლოთაშვილს მიიყვანს. ამის შესახებ IPN ავრცელებს ინფორმაციას.

ამავე გამოცემის ცნობით, აღნიშნული ოთხი პირიდან ირაკლი ხმალაძე თბილისის ვიცე-მერის თანამდებობას დაიკავებს.

ირაკლი ხმალაძე ენერგეტიკის სამინისტროში კალაძის მოადგილის თანამდებობა იკავებდა. წინასაარჩევნო პერიოდში ის კალაძის საარჩევნო კამპანიაში ჩაერთო. მანვე მოამზადა თბილისის ურბანულ და ეკონომიკურ განვითარებასთან დაკავშირებული პროგრამები.

მაია ბითაძე სექტემბრის შუა რიცხვებამდე გარემოს დაცვის მინისტრის მოადგილის თანამდებობას იკავებდა, რის შემდეგაც მანაც კალაძის საარჩევნო შტაბში გადაინაცვლა.

ლაშა კვანტალიანი კალაძის გუნდში მართვის პოლიტიკასთან დაკავშირებულ საკითხებს კურირებდა, თემურ ბოლოთაშვილმა კი ურბანულ პოლიტიკაზე იმუშავა.

ამავე ინფორმაციას საზოგადოებრივი მაუწყებელი ავრცელებს. ირაკლი ხმალაძემ მაუწყებელს განუცხადა, რომ ის კახა კალაძის ნებისმიერ შეთავაზებას დათანხმდება.