ჰანტავირუსის გავრცელების რისკი კიდევ არსებობს — ჯანდაცვის მსოფლიო ორგანიზაციის (WHO) გენერალურმა დირექტორმა, ტედროს ადჰანომ გებრეიესუსმა განაცხადა, რომ ჰანტავირუსის ბოლოდროინდელი აფეთქების შეკავების მცდელობები "ჯერ არ დასრულებულა".

ეს განცხადება მას შემდეგ გაკეთდა, რაც ცნობილი გახდა, რომ ესპანეთის კანარის კუნძულებზე ვირუსით დაინფიცირებული საკრუიზო გემის, MV Hondius-ის ყველა მგზავრის ევაკუაცია წარმატებით განხორციელდა.

"ამ ეტაპზე არ არსებობს ნიშნები იმისა, რომ უფრო მასშტაბური ეპიდაფეთქების მოწმენი ვხდებით... თუმცა, ვითარება შეიძლება შეიცვალოს. ვირუსის ხანგრძლივი ინკუბაციის პერიოდიდან გამომდინარე, შესაძლოა, მომდევნო კვირებში ახალი შემთხვევები გამოვლინდეს, — აღნიშნა გებრეიესუსმა ესპანეთის პრემიერ-მინისტრ პედრო სანჩესთან ერთად გამართულ ერთობლივ პრესკონფერენციაზე.

მოვლენების ქრონოლოგია

  • 1 აპრილი — 2026: ჰოლანდიურმა საკრუიზო გემმა, MV Hondius-მა, დატოვა არგენტინა.

  • 11 აპრილი — გემზე მყოფი ერთ-ერთი მგზავრი გარდაიცვალა. მოგვიანებით მისი მეუღლეც დაიღუპა იოჰანესბურგის (სამხრეთ აფრიკა) საავადმყოფოში.

  • გართულება: მესამე მსხვერპლის — გერმანელი ქალის გარდაცვალების შემდეგ, გადაწყდა გემის ტენერიფეს პორტში გაჩერება მგზავრების ტესტირებისა და დაინფიცირებულთა ევაკუაციის მიზნით.

  • ევაკუაცია: გასულ კვირას, კვირასა და ორშაბათს, გემზე დარჩენილი ბოლო 120 მგზავრის ევაკუაცია დასრულდა.

ამ დროისთვის ჰანტავირუსის 11 დადასტურებული შემთხვევაა გამოვლენილი შემდეგ ქვეყნებში: ესპანეთი, საფრანგეთი, ნიდერლანდები, შვეიცარია, დიდი ბრიტანეთი და აშშ.

ინფორმაციისთვის, ჰანტავირუსი არის "ანდესის" (Andes) შტამი, რომელიც იწვევს გრიპის მსგავს სიმპტომებს, თუმცა გაცილებით მძიმე ფორმებში შეიძლება გადაიზარდოს. ვირუსს ახასიათებს მაღალი სიკვდილიანობა, თუმცა არ არის ისეთივე გადამდები, როგორც, მაგალითად, წითელა ან კოვიდ-19.

ანტავირუსი, მღრღნელებისგან (თაგვები, ვირთხები) მოდის — ინფექცია გადაეცემა მღრღნელების ექსკრეტებთან კონტაქტში მყოფი ჰაერის ნაწილაკების ჩასუნთქვით. ვირუსი განსაკუთრებული იმითაა, რომ მას შეუძლია ადამიანიდან ადამიანზე გადადება, თუმცა ეს ხდება მხოლოდ ძალიან ახლო და ხანგრძლივი ფიზიკური კონტაქტის დროს — ვირუსი არ ვრცელდება ყოველდღიური სოციალური კონტაქტით საზოგადოებრივ ადგილებში, მაღაზიებში, სამსახურსა თუ სკოლებში.

დაავადება იწყება გრიპის მსგავსად: მაღალი სიცხე, დაღლილობა და კუნთების ტკივილი, სუნთქვის უკმარისობა, მუცლის ტკივილი, გულისრევა, პირღებინება ან დიარეა. ვირუსის სიმპტომები ვლინდება კონტაქტიდან 2-დან 4 კვირამდე შუალედში, თუმცა შეიძლება ერთ თვეზე მეტი დროც დასჭირდეს.

ჰანტავირუსის საწინააღმდეგო სპეციფიკური წამალი ან ვაქცინა არ არსებობს. მკურნალობა მიმდინარეობს სიმპტომურად. თუმცა, ჰოსპიტალიზაცია და ადრეული სამედიცინო ჩარევა მკვეთრად ზრდის გადარჩენის შანსს.