"თუ ეს რეჟიმი გაათავისუფლებს პოლიტპატიმრებს და ხელს შეუწყობს სიტუაციის დეესკალაციას, ასეთ ვითარებაში, დაინტერესებული ვართ, ვაწარმოოთ შესაძლო დიალოგი ახალი არჩევნების დანიშვნაზე" — განაცხადა ძლიერი საქართველო – ლელოს საგარეო მდივანმა გრიგოლ გეგელიამ ჟურნალისტებთან საუბრისას. კომენტარს IPN ავრცელებს.

გეგელიას თქმით, თუ ხელისუფლება გარკვეულ დათმობებზე წავა, ოპოზიცია ახალი არჩევნების დანიშვნის საკითხზე დიალოგში ჩართვით დაინტერესდება.

"რაც შეეხება დიალოგს, ჩვენ ერთ თვეზე მეტია ძალიან მკაფიო განცხადება გავაკეთეთ. მიგვაჩნია, რომ უნდა გათავისუფლდნენ პოლიტიკური პატიმრები, რეჟიმმა საკუთარი ერისადმი დადებითი სიგნალი უნდა გაგზავნოს. იმ შემთხვევაში, თუ ეს რეჟიმი წავა გარკვეული დათმობების გზაზე და დადებით ნაბიჯებს გადადგამს, მათ შორის გაათავისუფლებს პოლიტპატიმრებს და ხელს შეუწყობს სიტუაციის დეესკალაციას, ასეთ ვითარებაში, ჩვენ დაინტერესებული ვართ, ვაწარმოოთ შესაძლო დიალოგი ახალი არჩევნების დანიშვნასთან დაკავშირებით," — განაცხადა მან.

მისივე თქმით, აღნიშნული პოზიცია ოპოზიციას ადრეც ჰქონდა დაფიქსირებული.

"ეს განცხადება ჩვენ ადრეც გავაკეთეთ და ეს აღმოჩნდა სწორი პათოსი. ეს პათოსი აქვს ევროპასაც, ამერიკასაც და ჩვენც, ყველას", — აღნიშნა მან.

გეგელიამ, აქვე, ისაუბრა ახლად არჩეულ კათოლიკოს-პატრიარქზე და გამოთქვა იმედი, რომ მისი პატრიარქობა ქვეყანაში ახალი და პოზიტიური პროცესების დასაწყისი იქნება.

"იმედი მაქვს, ახალი კათოლიკოსი ახალი ეპოქის დასაწყისი იქნება და მისი უწმინდესობა მოისურვებს, შეძლებს სამოქალაქო კონსოლიდაციას. დღეს ჩვენ, როგორც ერს, ძალიან გვჭირდება დადებითი შინაარსის ირგვლივ გაერთიანება. როგორც მოქალაქეს, მინდა ეს მისი უწმინდესი შიო მესამისგან ვნახო," — განაცხადა მან.