2026 წლის ევროვიზიის დაწყებამდე საათებიღა გვაშორებს. საიუბილეო, რიგით 70-ე ევროფესტივალი 12 მაისს პირველი ნახევარფინალური ტურით აიღებს სტარტს. სწორედ პირველ საკონკურსო დღეს გამოვა მილიონობით მაყურებლის წინაშე საქართველოს წარმომადგენელი ჯგუფი ბზიკები. სამეული — მარიამ კიკუაშვილი, გიორგი შიოლაშვილი და მარიამ თათულაშვილი — რომელმაც საქართველოს საბავშვო ევროვიზიაზე პირველი გამარჯვება მოუტანა 2008 წელს, ამჯერადაც გიგა კუხიანიძის საკონკურსო სიმღერით წარდგება. სიმღერა On Replay პირველ ნახევარფინალში მე-6 ნომრად გაჟღერდება.

ნახევარფინალური შოუს მოახლოებასთან ერთად, მღელვარება იმატებს და დრამატულად იცვლება პროგნოზებიც. და სანამ კონკურსის მონაწილეები გენერალურ რეპეტიციას გადიან, შეგვიძლია თვალი გადავავლოთ, როგორია კონკურსის ფანებისა და ბუქმეიკერების განწყობა. თუმცა, თავდაპირველად გავიგოთ,

როგორ გამოვლინდებიან ფინალისტები

ფოტო: EBU

წლევანდელ ევროვიზიაზე 35 ქვეყანა მონაწილეობს. აქედან ხუთი — მასპინძელი ავსტრია და დიდი ოთხეული (ქვეყნები, რომლებსაც ყველაზე დიდი წვლილი შეაქვთ ორგანიზებაში: გაერთიანებული სამეფო, გერმანია, იტალია და საფრანგეთი) — კონკურსის გარეშე ხვდება ფინალში. დანარჩენი ქვეყნები კი ორ ნახევარფინალში არიან განაწილებულები. ამდენად, საქართველოსთან ერთად, პირველ ნახევარფინალში 14 ქვეყანა მონაწილეობს. მათგან ფინალის საგზურს მხოლოდ 10 მოიპოვებს.

ხმის მიცემის პროცესში წელს ბევრი რამ შეიცვალა. 2022 წლის შემდეგ პირველად, ფინალისტებს ტელემაყურებელთან ერთად ისევ გამოავლენს ჟიური. ამასთან, თითოეულ ქვეყანაში ჟიურის შემადგენლობა ხუთი წევრიდან შვიდამდე გაიზარდა და სავალდებულო გახდა, რომ ორი მათგანი 18-დან 25 წლამდე ასაკის იყოს. წესები შეიცვალა მაყურებლისთვისაც: ცხადია, ისევ დაუშვებელია საკუთარი ქვეყნისთვის ხმის მიცემა, მაგრამ ადრინდელისგან განსხვავებით, ტელეფონის თითო ნომრიდან მაქსიმუმ მხოლოდ 10-ჯერ შეძლებთ ხმის მიცემას (და არა 20-ჯერ, როგორც აქამდე იყო).

ჟიურისა და ტელემაყურებლის ქულები დაჯამდება და გამოვლინდება ნახევარფინალის საუკეთესო ათეული, რომელიც ფინალში გამარჯვებისთვის იბრძოლებს. ნახევარფინალის შედეგებს მხოლოდ კონკურსის დასრულების შემდეგ, კვირას, გავიგებთ, უშუალოდ შოუს მიმდინარეობისას კი 10 ფინალისტი შემთხვევითი რიგითობის პრინციპით დასახელდება.

როგორია პროგნოზი საქართველოსთან დაკავშირებით

სიმართლე გითხრათ — არცთუ დამაიმედებელი. ბუქმეიკერების პროგნოზში, სადაც ფსონების მიხედვითაა რეიტინგი შედგენილი, საქართველო ბოლოდან მეორე პოზიციას, მე-14 ადგილს იკავებს. აღსანიშნავია, რომ ჩვენი რეიტინგული მაჩვენებელი მას შემდეგ გაუარესდა, რაც 6 მაისს მეორე რეპეტიციის ვიდეოდან მოკლე ნაწყვეტი გავრცელდა. იმავე დღეს საქართველო მე-10 პოზიციიდან ჯერ მე-13-ზე ჩამოქვეითდა, მოგვიანებით კი კიდევ უფრო ქვემოთ მოექცა. უფრო თვალსაჩინო რომ იყოს სურათი, ბუქმეიკერების პროგნოზით, 13 აპრილიდან დღემდე, საქართველოს ფინალში გადასვლის შანსები 66%-იდან 32%-მდე შემცირდა.

თუმცა, არ უნდა დაგვავიწყდეს, რომ ბუქმეიკერებიც ცდებიან და ზოგჯერ — ძალიან მწარედაც. უახლესი ისტორიაც რომ გავიხსენოთ, 2024 წელს ფინალში გადავიდა ლატვია, რომელსაც ფსონებით ნახევარფინალში ბოლო, მე-16 ადგილს უწინასწარმეტყველებდნენ. 2025 წელს ფინალის საგზური მოიპოვა პორტუგალიამ, რომელიც ბუქმეიკერებს ასევე ბოლო, მე-15 ადგილზე ჰყავდათ.

როგორია ფანების განწყობა

მოკლედ რომ გითხრათ, ბუქმეიკერების პროგნოზზე უფრო დამაიმედებელი. რეპეტიციის ვიდეოს გავრცელების შემდეგ, ფორუმებსა და სოციალურ ქსელებში ბზიკების სცენოგრაფიას აქტიურად განიხილავდნენ. განსაკუთრებული ყურადღება მიიქცია გამოსახულებამ ეკრანზე, სადაც ჯგუფის წევრების კიბორგული "კლონები" ჩანს. ამან ფანების ნაწილის მხრიდან კრიტიკა დაიმსახურა, რადგან ჩათვალეს, რომ ანიმაცია ხელოვნური ინტელექტით იყო გენერირებული. მეტიც, ჯგუფს მოუწია, განემარტა, რომ ვიზუალური მასალა მთლიანად ადამიანების მიერაა შექმნილი. ეს დისკუსია სიმბოლურიც კია, თუ გავითვალისწინებთ, რომ ჩვენი საკონკურსო სიმღერა წელს "ხელოვნურ ინტელექტსა და თანამედროვე ეპოქაში ადამიანის როლს" შეეხება.

ფოტო: EBU

რაც შეეხება რეიტინგს, ფანების ყველაზე დიდ აპლიკაციაში My Eurovision Scoreboard, საქართველო 15 ნახევარფინალისტს შორის მე-7 პოზიციას იკავებს, ამდენად ფინალისტად მოიაზრება. ფინალისტად მოიაზრებს ბზიკებს ევროვიზიის მიმომხილველი ყველაზე დიდი გამოცემაც, Wiwibloggs, რომელმაც, სხვათა შორის, საქართველო წლევანდელ კონკურსზე თავის რჩეულ ათეულშიც დაასახელა.

მღელვარებასაც და პროგნოზებსაც წერტილი ხვალ დაესმება. ევროვიზიის პირველი ნახევარფინალი თბილისის დროით 23 საათზე დაიწყება.

მანამდე კი, არ დაგავიწყდეს, თავადაც დაგვეხმარო პროგნოზის გაკეთებაში და მონაწილეობა მიიღო ჩვენს გამოკითხვაში: გადავლენ ბზიკები ევროვიზიის ფინალში?

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...