მთავრობის სხდომაზე ირაკლი კობახიძემ 2024 წელს მიმდინარე აქციების დროს ძალის გადამეტების ფაქტზე დაკავებულ სამართალდამცავებზე კომენტარი გააკეთა. კობახიძის თქმით, აღნიშნულმა პირებმა "ძალადობრივი მიტინგების მიმდინარეობისას" ძალას გადაამეტეს.

"გუშინ დაკავებული იქნა ძალოვანი სტრუქტურების ხუთი წარმომადგენელი, რომლებსაც ბრალი ედებათ ძალადობაში გასული წლის ნოემბერ-დეკემბერში ძალადობრივი მიტინგების მიმდინარეობისას. ამ ფაქტმაც დაადასტურა სამართალდამცავი ორგანოების კოორდინაციის განსაკუთრებული მნიშვნელობა. რა თქმა უნდა, ჩვენ გვაქვს ჩვენი ხელწერა, ჩვენ გვაქვს ჩვენი ამბიცია ვიმოქმედოთ ევროპულზე და ამერიკულზე მაღალი სტანდარტით, ჰუმანურობის მაღალი სტანდარტით მაშინაც, როდესაც სახელმწიფოს უწევს დაუპირისპირდეს კონსტიტუციური წყობილების შეცვლის ძალადობრივ მცდელობებს და ეს ხელწერა კიდევ ერთხელ აჩვენეთ. ძალიან მნიშვნელოვანია, ამ ხელწერის და სტანდარტის დასაცავად დაუსჯელი არ დარჩეს ძალის გადამეტების არცერთი შემთხვევა და სწორედ ამ დამოკიდებულების გამოხატულება იყო გუშინდელი ფაქტი — შესაბამისი პირების დაკავება. როდესაც ვხედავთ სამართალდარღვევას, რა თქმა უნდა, იქ აუცილებელია სახელმწიფოს რეაგირება," — განაცხადა კობახიძემ.

შემდეგ კობახიძემ მადლობა გადაუხადა ძალოვან უწყებებს, რომელთაც, მისი თქმით, "2020-2025 წლებში კონსტიტუციური წყობილების ძალადობით შეცვლის ოთხი ძალადობრივი მცდელობა წარმატებით აღკვეთეს".

"ასევე, მე ვისარგებლებ შემთხვევით და კიდევ ერთხელ გადავუხდი მადლობას ყველა სამართალდამცავ უწყებას, შინაგან საქმეთა სამინისტროს, თითოეულ პოლიციელს, განსაკუთრებით განსაკუთრებულ დავალებათა დეპარტამენტის თითოეულ თანამშრომელს, ასევე სახელმწიფო უსაფრთხოების სამსახურს, სახელმწიფო დაცვის სპეციალურ სამსახურს, ყველა შესაბამის უწყებას და შესაბამის თანამშრომლებს, რომლებმაც 2020-2025 წლებში წარმატებით აღკვეთეს კონსტიტუციური წყობილების ძალადობით შეცვლის ოთხი ძალადობრივი მცდელობა. შეგახსენებთ, რომ ოთხი წლის განმავლობაში ასეთი მცდელობა იყო ხუთი, აქედან ოთხი იყო ძალადობრივი. პირველ რიგში სწორედ სამართალდამცავი ორგანოების გამართული მუშაობის დამსახურებაა ის, რომ ჩვენ ეს ოთხი ძალადობრივი მცდელობა წარმატებით აღვკვეთეთ და კიდევ ერთხელ მადლობა ეკუთვნის, რა თქმა უნდა, სამართალდამცავი სტრუქტურების თითოეულ თანამშრომელს. მადლობა მათ და ყველას ვუსურვებ, რა თქმა უნდა, წარმატებებს. ბუნებრივია სახელმწიფო მომავალშიც მაქსიმალურად იზრუნებს სამართალდამცავი ორგანოების ღირსების დაცვაზე და თანამშრომლების პირობების მუდმივ გაუმჯობესებაზე," — განაცხადა კობახიძემ.

შეგახსენებთ, 2024 წელს მიმდინარე აქციების დროს ზვიად მოსიაშვილის, ლევან ხაბეიშვილის და გურამ როგავას მიმართ განხორციელებული ძალადობის ფაქტებზე სამი ყოფილი, ერთი მოქმედი სპეცრაზმელი და შსს-ს დაცვის პოლიიიის თანამშრომელი დააკავეს.

• POG: ზვიად მოსიაშვილის, ლევან ხაბეიშვილის და გურამ როგავას ცემის ფაქტებზე 4 სპეცრაზმელი და შსს დაცვის პოლიციის თანამშრომელი დააკავეს

დაკავებას წინ უძღვოდა ტელეკომპანია "ფორმულად" ეთერში გასული სიუჟეტი — გადაცემა "ნამდვილი ამბავი ელისო ჯარიაშვილთან" ცნობით, ჟურნალისტ გურამ როგავაზე თავდასხმიდან წელიწადნახევრის შემდეგ, ჟურნალისტ გურამ როგავაზე თავდამსხმელის ვინაობა დაადგინეს.

• "ფორმულას" ცნობით, გურამ როგავაზე თავდამსხმელის ვინაობა ცნობილია

14 მარტს, ეუთოს მოსკოვის მექანიზმის ანგარიშზე საუბრისას ირაკლი კობახიძემ განაცხადა, რომ "წამება თვითონ არის სიცრუე. რაც შეეხება ძალადობრივ ინციდენტებს, გადაცდომებს, მათ შორის სავარაუდოდ დანაშაულებრივ გადაცდომებს, აქ პრაქტიკული პრობლემები იყო, რის გამოც კონკრეტული დამნაშავეების დასჯა ვერ მოხერხდა". კობახიძემ "ძალადობრივ ინციდენტებზე საუბრისას" გურამ როგავას ინციდენტიც ახსენა.

• ირაკლი კობახიძე: "ეუთოს ანგარიში არის სიცრუით გაჯერებული. ყველამ ვიცით, რომ დასკვნა წინასწარ იყო დაწერილი"