საერთაშორისო გამჭირვალობა საქართველოს შეფასებით, 2025 წლის 4 ოქტომბრის საქმეზე დაკავებული 66 პირი, მათ შორის "საორგანიზაციო კომიტეტის" წევრები (პაატა ბურჭულაძე, მურთაზ ზოდელავა და სხვები) პოლიტიკური დევნის მსხვერპლნი არიან.

ბრალდების მხარე ფიგურანტებს ედავება კონსტიტუციური წყობილების ძალადობით შეცვლისკენ მოწოდებას და ჯგუფური ძალადობის ორგანიზებას. თუმცა, სამართლებრივი ანალიზი აჩვენებს:

  • ტერმინი "მშვიდობიანი დამხობა" წარმოადგენს პოლიტიკური იდეის ადვოკატირებას და არა ძალადობისკენ მოწოდებას. ეროვნული კრების დეკლარაციას ჰქონდა სიმბოლური ხასიათი და ის დაცულია კონსტიტუციით.

  • პრეზიდენტის რეზიდენცია არ წარმოადგენს ძალაუფლების ცენტრს, შესაბამისად, მის მიმართ განხორციელებული ნებისმიერი ქმედება ვერ შეფასდება სახელმწიფო ხელისუფლების დამხობის მცდელობად.

  • უზენაესი სასამართლოს პრაქტიკით, 225-ე მუხლისთვის საჭიროა წინასწარი შეკავშირება, რაც მოცემულ საქმეში მტკიცებულებებით არ დასტურდება.

ასევე, შეფასება ყურადღებას ამახვილებს პრეზიდენტის სასახლის ღობის ინციდენტზეც, სადაც წერს, რომ ჟურნალისტური გამოძიების მიხედვვით ("ნოდარ მელაძის შაბათი"), ღობის სექცია წინასწარ იყო გადაჭრილი და მავთულებით მიმაგრებული, რომელიც პოლიციამ დადგენილი წესით არ ამოიღო და არ დალუქა, რის გამოც დაცვის მხარეს ექსპერტიზის ჩატარების შესაძლებლობა მოისპო.

შეფასებაში ხაზგასმულია, რომ პოლიტიკური დევნა "ჩვეულებრივ მოვლენად" იქცა ქვეყანაში, სადაც 230-ზე მეტი ოფიციალური პირი, მათ შორის 47 მოსამართლე და 17 პროკურორი, საერთაშორისო სანქციების ქვეშ იმყოფება. ევროპული სასამართლოს პრეცედენტებით, მტკიცების ტვირთი, რომ დანაშაულის პროვოკაციას ადგილი არ ჰქონია, ბრალდების მხარეს აკისრია, რაც ამ შემთხვევაში შეუსრულებელია.