კომპანია Disney-ს და რეჟისორ ჯეიმს კამერონს კალიფორნიის ფედერალურ სასამართლოში უჩივლა მსახიობმა, რომელიც ამტკიცებს, რომ კამერონმა მისი გარეგნობა ბლოკბასტერ ავატარის პერსონაჟის, ნეიტირის, შესაქმნელად გამოიყენა.

ქორიანკა კილჩერმა სამშაბათს შეტანილ სარჩელში აღნიშნა, რომ კამერონმა ნეიტირის დიზაინისთვის "ამოიღო, მოახდინა რეპლიკაცია და კომერციულად გამოიყენა მისი სახის ნაკვთები". ის რეჟისორსა და Disney-ს საჯაროობის უფლების დარღვევაში ადანაშაულებს. Disney-ს წარმომადგენლებს სარჩელთან დაკავშირებით კომენტარი ჯერ არ გაუკეთებიათ.

"ის, რაც კამერონმა გააკეთა, არ ყოფილა შთაგონება, ეს იყო ექსტრაქცია (ამოღება)", — განაცხადა კილჩერის ადვოკატმა, არნოლდ პეტერმა — "მან აიღო 14 წლის მკვიდრი ამერიკელი გოგონას უნიკალური ბიომეტრიული მონაცემები, გაატარა ინდუსტრიულ საწარმოო პროცესში და გამოიმუშავა მილიარდობით დოლარის მოგება ისე, რომ მისთვის ნებართვა ერთხელაც არ უთხოვია".

კილჩერის დებიუტი 14 წლის ასაკში შედგა პოკაჰონტასის როლით ტერენს მალიკის 2005 წლის ფილმში ახალი სამყარო (The New World). მას ასევე აქვს როლი პოპულარულ სერიალში იელოუსტოუნი (Yellowstone).

ქორიანკა კილჩერი პოკაჰონტასის როლში, 2005 წლის ფილმში ახალი სამყარო

ფოტო: First Foot Films

პირველი ავატარი, რომელიც 2009 წელს გამოვიდა, თითქმის 3 მილიარდი დოლარით ყველა დროის ყველაზე შემოსავლიანი ფილმი გახდა. სერიის მესამე ფილმმა, ავატარი: ცეცხლი და ფერფლი, გასული წლის ბოლოს გამოსვლის შემდეგ, უკვე მილიარდ დოლარზე მეტი გამოიმუშავა.

ავატარის სერია ფოკუსირებულია ჰუმანოიდი უცხოპლანეტელების რასაზე, სახელად ნაავი, რომლებიც, სარჩელის მიხედვით, მკვიდრი ხალხების კულტურებზეა დაფუძნებული. ფილმებში ნეიტირის როლს ზოი სალდანა ასრულებს.

კილჩერი ამტკიცებს, რომ კამერონმა მისი ფოტო ნებართვის გარეშე გამოიყენა, როგორც წყარო ნეიტირის ციფრული სახის შესაქმნელად. სარჩელში ნათქვამია, რომ კამერონმა ერთ-ერთ ინტერვიუში თავად აღიარა, რომ ნეიტირის დიზაინის საფუძვლად გამოიყენა კილჩერის (რომელიც წარმოშობით პერუელი ინდიელია) გამოსახულება ფილმიდან ახალი სამყარო.

"შედეგად მივიღეთ უზარმაზარი შემოსავლის მქონე ფრენჩაიზი, რომელიც პოზიციონირებს, როგორც მკვიდრი მოსახლეობის პრობლემების მიმართ თანაგრძნობით განმსჭვალული, მაშინ, როცა კულისებში ჩუმად ახდენდა მკვიდრი ახალგაზრდის ექსპლუატაციას", — ნათქვამია სარჩელში.

კილჩერი ითხოვს ფულად ანაზღაურებას კალიფორნიის საჯაროობის უფლების შესახებ კანონის დარღვევისთვის, რომელიც კრძალავს კომერციული მიზნებისთვის ადამიანის გარეგნობის ან მსგავსების გამოყენებას მისი თანხმობის გარეშე.