საქართველოს მეხუთე პრეზიდენტი, სალომე ზურაბიშვილი, ერევანში გამართული სამიტის ფარგლებში საქართველოს მთავრობის მიერ გავრცელებულ კადრებს სოციალურ ქსელში ეხმაურება და აცხადებს, რომ უცხოელ ლიდერებთან შეხვედრები, მათ შორის ვოლოდიმირ ზელენსკთან, ავტომატურად განსაკუთრებულ მნიშვნელობას არ იძენს, თუმცა შეხვედრების შინაარსი საინტერესოა ქვეყნის საგარეო პოლიტიკის კონტექსტში.

"საზოგადოება შფოთავს ერევანის კობახიძეს "შეხვედრების" კადრებზე… თუმცა აქ არაფერი ახალი არაა, ამ კონფერენციაზე შარშანაც იყო მიწვეული და ჩვეულებრივად პროტოკოლის წესებს იცავენ ჩვენი ზრდილი პარტნიორები. ამიტომ ხელის ჩამორთმევას და ორიოდე სიტყვის გაცვლას რამე განსაკუთრებული დატვირთვა არ აქვს.

უფრო საინტერესოა ზელენსკისთან შეხვედრის შინაარსი! თუ ეს ნიშნავს, რომ რუსეთის შესუსტების ფონზე, უნგრეთის შეცვლილ პოზიციის მსგავსად, საქართველოსაც ხომ არ უწევს უკრაინის მიმართ პოზიციის გადახედვა? ნეტავ!

ზოგადად კი იმასაც უნდა ვაქცევდეთ ყურადღებას : საქართველო რეგიონში, ევროპისა და დასავლეთის სანდო პარტნიორის როლისთვის უარი რომ არ ეთქვა ორი წლის წინ, არა ერთი ლიდერი ერევანისკენ მიმავალ გზაზე ან დაბრუნებისას თბილისშიც რამდენიმე საათით მაინც გაჩერდებოდა. და საერთოდ ზურგი რომ არ შეგვექცია ჩვენი კონსტიტუცით დადგენილ ევროინტეგრაციის კურსისთვის სულაც თბილისში ჩატარდებოდა ეს მნიშვნელოვანი პანევროპული კონფერენცია.

სწორედ ის ფაკტი, რომ რეჟიმი იძულებულია თავი მოაწონოს ორიოდე შემორჩენილ ამომრჩეველს, ყოველდღიურად ნალანძღი ევროპის და უკრაინის ლიდერებთან გადაღებულ კადრებით, ყველა კომენტარზე ბევრის მთქმელია!" — განაცხადა მან.

ცნობისთვის, მსოფლიო ლიდერები კვირას სომხეთში, ერევანში ევროპული პოლიტიკური გაერთიანების მე-8 სამიტზე დასასწრებად ჩავიდნენ. სამიტი დღეს, 4 მაისს გაიხსნა. მასში 48 ქვეყნის ლიდერი, მათ შორის ევროკავშირის 27 წევრი ქვეყნის წარმომადგენელი მონაწილეობს.

საქართველოს მთავრობამ სოციალურ ქსელში გაავრცელა ირაკლი კობახიძის მსოფლიო ლიდერებთან შეხვედრის კადრები. გავრცელებულ ფოტოებში ირაკლი კობახიძე საფრანგეთის პრეზიდენტ ემანუელ მაკრონს, სომხეთის პრემიერ ნიკოლ ფაშინიანს, უკრაინის პრეზიდენტ ვოლოდიმირ ზელენსკის და ევროპარლამენტის პრეზიდენტ რობერტა მეცოლას ხელს ართმევს.