"აზერბაიჯანსა და სომხეთს შორის მშვიდობა რეალობაა," — ამის შესახებ აზერბაიჯანის პრეზიდენტმა, ილჰამ ალიევმა ერევანში, ევროპული პოლიტიკური გაერთიანების სამიტზე ვიდეომიმართვისას განაცხადა. ინფორმაციას აზერბაიჯანული სააგენტო, APA ავრცელებს.

ალიევის თქმით, სამიტში მისი ვიდეოფორმატით ჩართვა წინასწარ იყო შეთანხმებული ევროპული საბჭოს პრეზიდენტ ანტონიუ კოშტასთან აზერბაიჯანში გამართული შეხვედრისას.

აქვე, ალიევმა ისაუბრა ევროკავშირის ლიდერებთან ძველ შეხვედრაზე და აღნიშნა, რომ მხარი დაუჭირა 2026 წლის სამიტის სომხეთში ჩატარებას, თუმცა სამომავლოდ შეხვედრის გამართვას აზერბაიჯანში ითხოვს.

"აზერბაიჯანსა და სომხეთს შორის მშვიდობა რეალობაა. ევროპული საბჭოს პრეზიდენტის, ანტონიუ კოშტას აზერბაიჯანში ვიზიტის დროს ჩვენ განვიხილეთ ჩემი მონაწილეობა სამიტში და შევთანხმდით, რომ მას ვიდეოფორმატში შევუერთდებოდი.

ასევე მსურს გაცნობოთ, რომ ერთი წლის წინ, ჩემს შეხვედრაზე პრეზიდენტ კოშტასა და ურსულა ფონ დერ ლაიენთან, მათ მკითხეს ჩემი აზრი 2026 წლის მაისში სამიტის სომხეთში ჩატარების იდეაზე. მე მხარი დავუჭირე ამ ინიციატივას და, თავის მხრივ, შევთავაზე, რომ ერთ-ერთი მომდევნო სამიტი აზერბაიჯანში ჩატარებულიყო ბალანსის შესანარჩუნებლად. ეს წინადადება მიღებულ იქნა და შესაბამისად, 2028 წლის მაისში წევრებს აზერბაიჯანში ვიწვევ. სხვათა შორის, სომხეთმაც მხარი დაუჭირა ჩვენს კანდიდატურას, რაც ნათლად აჩვენებს, რომ აზერბაიჯანსა და სომხეთს შორის მშვიდობა რეალობაა," — განაცხადა ილჰამ ალიევმა.

ცნობისთვის, მსოფლიო ლიდერები კვირას სომხეთში, ერევანში ევროპული პოლიტიკური გაერთიანების მე-8 სამიტზე დასასწრებად ჩავიდნენ. შეხვედრის დევიზია "მომავლის შენება: ერთიანობა და სტაბილურობა ევროპაში" იმართება.

48 ქვეყნის ლიდერი, მათ შორის ევროკავშირის 27 წევრი ქვეყნის წარმომადგენელი, 4 მაისს, შეიკრიბება, რათა მნიშვნელოვანი პოლიტიკური საკითხები განიხილონ.

სამიტის ფარგლებში სომხეთის პრემიერმინისტრმა ნიკოლ ფაშინიანმა განაცხადა, რომ იმედოვნებს, რომ 2028 წელს აზერბაიჯანში EPC-ის მე-10 სამიტს დაესწროს.