ეს უკვე მეორე შემთხვევაა, როდესაც მსახიობმა ფანებს შენიშვნა მისცა იმის გამო, რომ შუა სპექტაკლისას "დოქტორ სანტოსს" ეძახიან.

ისა ბრიონესი The Pitt-ის ფანებს თეატრის ელემენტარულ ეტიკეტს ასწავლის, მსახიობი, რომელიც აპრილში ბროდვეის სპექტაკლს Just in Time-ს შეუერთდა, გულშემატკივრებს სთხოვს, შეწყვიტონ ყვირილი წარმოდგენისას. "ძალიან მაბრაზებთ", — გააფრთხილა ბრიონესმა წესრიგის დამრღვევი ფანები.

ისა ბრიონესი და დოქტორი ტრინიტი სანტოსი ერთი და იგივე პიროვნება არ არიან. თუმცა, რადგან ზოგიერთი ფანი ვერ ახერხებს The Pitt-ის მსახიობის გამიჯვნას მისი სატელევიზიო პერსონაჟისგან, ბრიონესი კიდევ ერთხელ აძლევს მკაცრ გაფრთხილებას მათ, ვინც ბროდვეის დადგმაში Just In Time მის სანახავად მიდის.

"ჰეი ჰეი ჰეი", — Variety-ის ინფორმაციით, ასე დაიწყო ბრიონესმა ინსტაგრამ სთორი (რომელსაც უკვე ამოეწურა დრო და აღარ ჩანს) — "კიდევ ერთხელ ვამბობ, ბროდვეი არ არის ცირკი. ნუ უყვირით შემსრულებლებს ყველაფერს, რაც თავში მოგივათ. სცენაზე მყოფი არტისტების და სხვა მაყურებლების მიმართ უკიდურესი უპატივცემულობაა სანამ სიმღერას დავიწყებდე "როდის აპირებ სამედიცინო ისტორიის შევსებას?" ყვირილი. ძალიან მაბრაზებთ".

ისა ბრიონესი კონი ფრენსისის როლში სპექტაკლში Just In Time

ფოტო: ბრიუს გლიკასი/Getty Images

ეს მეორე შემთხვევაა, როდესაც ბრიონესმა, რომელიც 50-იანი წლების ვარსკვლავის, კონი ფრენსისის როლის შესასრულებლად დასს აპრილში შეუერთდა, განცხადება გაავრცელა და ფანებს თეატრის ეტიკეტი შეახსენა. ბრიონესი ბროდვეის ვეტერანია, მისი დებიუტი 2024 წელს შედგა ევრიდიკეს როლით სპექტაკლში Hadestown. თუმცა, ახლა სცენაზე დაბრუნება მოჰყვა მსახიობის მასშტაბურ აღიარებას, რომელიც HBO-ს სამედიცინო დრამა The Pitt-ში მეორე კურსის სტუდენტის, ტრინიტი სანტოსის როლით მოიპოვა.

როგორც ჩანს, მსახიობის პირისპირ ნახვისას, ჰიტად ქცეული სამედიცინო დრამის ფანები ემოციების შეკავებას ვერ ახერხებენ. შოუში მონაწილეობის დაწყებიდან ორი კვირის შემდეგ, ბრიონესმა ინსტაგრამ სთორიში დაწერა პოსტი, სადაც მიმართავდა ერთ კონკრეტულ დამსწრეს, რომელმაც სიმღერის დროს გაჩუმება ვერ შეძლო.

"ზოგიერთ ადამიანს სჭირდება თეატრის ეტიკეტის გადამეორება, ისევე როგორც ზოგადად ადამიანური ქცევის წესების", — დაწერა მსახიობმა 12 აპრილის პოსტში — "ნუ ელაპარაკებით შემსრულებლებს, როდესაც ისინი სცენაზე გამოდიან (თუ ამას თავად არ გთხოვენ)".

ისა ბრიონესი დოქტორი სანტოსის როლში HBO-ს სერიალში The Pitt

ფოტო: უორიკ პეიჯი/HBO Max

მან დაამატა: "ნუ მომმართავთ სცენაზე და ნუ მიწოდებთ დოქტორ სანტოსს. მე არ ვარ დოქტორი სანტოსი. მე არც კონი ფრენსისი ვარ. მე ვარ ისა ბრიონესი, ერთ-ერთი მსახიობი იმ შოუში, რომლის სანახავადაც ფული გადაიხადეთ. ასე რომ, უყურეთ პატივისცემით. თქვენ არ ხართ ბავშვი დისნეილენდში. თქვენ ხართ ზრდასრული ადამიანი ბროდვეის შოუზე. მოიქეცით შესაბამისად".

The Pitt არის HBO-ს სამედიცინო დრამა, რომელიც 2025 წლიდან გადის HBO Max-ზე. სერიალი გვიამბობს პიტსბურგის სატრავმო სამედიცინო ცენტრის პერსონალის შესახებ გადატვირთულ სასწრაფო დახმარების განყოფილებაში. სერიალს განსაკუთრებულად აქებენ რეალისტურობისთვის, სამედიცინო სფეროს ზუსტად ასახვისა და ჯანდაცვის სფეროში მომუშავე ადამიანების პანდემიის შემდგომი ფსიქოლოგიური გამოწვევების ჩვენებისთვის. სერიალის პირველმა სეზონმა მოიგო ემის ხუთი ჯილდო, მათ შორის საუკეთესო დრამატული სერიალის ჯილდო, ხოლო ოქროს გლობუსზე დასახელდა საუკეთესო სერიალად.