არასრულწლოვანის მიმართ განხორციელებული სექსუალური ძალადობის მრავალეპიზოდიან საქმეზე სასამართლომ გამამტყუნებელი განაჩენი გამოიტანა. ამის შესახებ ინფორმაციას არასამთავრობო ორგანიზაცია "საფარი" ავრცელებს. მათი ინფორმაციით, 2026 წლის 27 აპრილის გადაწყვეტილებით, მოძალადე მამინაცვალს 6 წლით თავისუფლების აღკვეთა მიესაჯა.

დაზარალებულმა "საფარს" დახმარებისთვის 2024 წელს მიმართა. საქმეში ორგანიზაციის იურისტი მარი ვარამაშვილი ჩაერთო. გამოძიების პროცესში გამოიკვეთა წლების განმავლობაში ჩადენილი მძიმე დანაშაულები, მათ შორის არასრულწლოვანის მიმართ განხორციელებული გარყვნილი ქმედება, სისტემატური სექსუალური ძალადობის ეპიზოდები.

როგორც "საფარი" წერს, იურისტის ჩართულობით საქმეზე ყველა შესაძლო მტკიცებულება მოიპოვეს, თუმცა სასამართლოსთვის მთავარი დაზარალებულის ჩვენება აღმოჩნდა. მოსამართლემ სრულად გაიზიარა არასრულწლოვანის მიერ მიწოდებული ინფორმაცია და პირი დამნაშავედ ცნო.

"2024 წელს საფარს მიმართა არასრულწლოვანმა, რომელზეც მამინაცვალმა სექსუალურად იძალადა. ბავშვის მთავარი მოთხოვნა კონფიდენციალურობის დაცვა იყო, რაც საფარმა გაითვალისწინა და უზრუნველყო.

საქმეში საფარის იურისტი მარი ვარამაშვილი ჩაერთო, რომელსაც დაზარალებულმა მრავალეპიზოდიანი საქმე სრულად გაანდო. საქმეში ბევრი სხვადასხვა დანაშაული, მათ შორის, მამინაცვლის მხრიდან ბავშვის მიმართ წლების წინ განხორციელებული გარყვნილი ქმედება იკვეთებოდა, რაც სასჯელის სახედ 5-დან 9 წლამდე თავისუფლების აღკვეთას ითვალისწინებს.
ა
მარი ვარამაშვილის ჩართულობით მოპოვებულ იქნა ყველა შესაძლო მტკიცებულება, თუმცა საქმეში გადამწყვეტი დაზარალებულის ჩვენება აღმოჩნდა, რომელიც მოსამართლემ სრულად გაიზიარა, 2026 წლის 27 აპრილს გამამტყუნებელი განაჩენი გამოიტანა და პირი გარყვნილ ქმედებაში დამნაშავედ სრულად ცნო. მას 6 წლით თავისუფლების აღკვეთა განესაზღვრა", — წერია "საფარის" განცხადებაში.