პარტიის გახარია საქართველოსთვის ერთ-ერთი ლიდერი, ბერდია სიჭინავა პარლამენტში ინიცირებულ კანონპროექტს ეხმიანება, რომლის საფუძველზეც მთავრობის შემადგენლობაში სამართალდამცავი ორგანოების კოორდინაციის საკითხებში სახელმწიფო მინისტრის თანამდებობის შემოღება იგეგმება. ამის შესახებ პარტიის ლიდერი სოციალურ ქსელში წერს.

მისი თქმით, ახალ სტრუქტურას დამოუკიდებელი აპარატი არ ექნება და მისი ფუნქციონირება მთლიანად მთავრობის ადმინისტრაციაზე იქნება დამოკიდებული.

"პარლამენტში შეტანილი კანონპროექტით, გენერალ-კოორდინატორს ისეთ სამინისტროს უკეთებენ, რომელსაც საკუთარი აპარატიც კი არ ექნება და მის მატერიალურ-ტექნიკურ და ორგანიზაციულ უზრუნველყოფას მთავრობის ადმინისტრაცია განახორციელებს.

გაგეგდოთ ბარემ, პირდაპირ," — განაცხადა მან.

სიჭინავამ სოციალურ ქსელში, კანონპროექტის მე-6 პუნქტის ამონარიდი გამოაქვეყნა:

"სამართალდამცავი ორგანოების კოორდინაციის საკითხებში საქართველოს სახელმწიფო მინისტრის საქმიანობის მატერიალურ-ტექნიკურ და ორგანიზაციულ უზრუნველყოფას ახორციელებს საქართველოს მთავრობის ადმინისტრაცია, ხოლო შერიგებისა და სამოქალაქო თანასწორობის საკითხებში საქართველოს სახელმწიფო მინისტრის საქმიანობას უზრუნველყოფს შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატი".

ცნობისათვის, ქართულ ოცნებაში საკადრო ცვლილებები 21 აპრილს განხორციელდა. ამის შესახებ ბრიფინგზე ირაკლი კობახიძემ განაცხადა. მისი თქმით, შს მინისტრმა გეკა გელაძემ სუს-ის უფროსის პოსტზე მამუკა მდინარაძე ჩაანაცვლა. თავის მხრივ — სუს-ის უფროსი მამუკა მდინარაძე სამართალდამცავი ორგანოების კოორდინაციის საკითხებში სახელმწიფო მინისტრად დაინიშნება და ვიცეპრემიერობასაც შეითავსებს. შს მინისტრის კი პოსტს აჭარის ავტონომიური რესპუბლიკის მთავრობის თავმჯდომარე სულხან თამაზაშვილი დაიკავებს.