რასელ ბრენდი ცოტა ხნის წინ "მეგინ კელის შოუში" (The Megyn Kelly Show) გამოჩნდა და აღიარა, რომ 30 წლის ასაკში სქესობრივი კავშირი ჰქონდა 16 წლის მოზარდთან. მიუხედავად იმისა, რომ მან ხაზგასმით აღნიშნა, რომ გაერთიანებულ სამეფოში სქესობრივი თანხმობის ასაკი 16 წელია, იქვე დასძინა, რომ მასზე გაცილებით უმცროს ადამიანთან კავშირი "ექსპლუატატორული" ქმედება იყო.

"მადლობა, მეგინ კელი, რომ მომეცით საშუალება გამომეხატა ჩემი პოზიცია, განსაკუთრებით კი თქვენს ბრაზზე, რომელიც სრულიად ლეგიტიმური და გასაგებია", — განაცხადა მან — "ფაქტი ისაა, რომ ევროპაში და გაერთიანებულ სამეფოში, საიდანაც მე ვარ, თანხმობის ასაკი 16 წელია. მქონდა სქესობრივი კავშირი 16 წლის გოგონასთან, როდესაც 30-ის ვიყავი, თუმცა მაშინ სულ სხვა ადამიანი ვიყავი, გაცილებით ახალგაზრდა და მოუმწიფებელი 30 წლის კაცი".

ბრენდმა საუბარი განაგრძო: "თანხმობით დაწყებული სექსიც კი, როდესაც საქმე გვაქვს ძალაუფლების დიდ დისბალანსთან, რაც ყოველთვის არსებობს, როცა ცნობილი ადამიანი ხარ და გაქვს ქალების მიზიდვის ისეთი უნარი, როგორიც მე მაშინ მქონდა, ვფიქრობ, ექსპლუატაციას მოიცავს. მიმაჩნია, რომ ეს ძალაუფლების ბოროტად სარგებლობაა. ვაცნობიერებ, რომ ჩემი წარსული სექსუალური ქცევა ეგოისტური იყო და საერთოდ არ ვუფიქრდებოდი იმას, როგორ მოქმედებდა ეს სხვა ადამიანებზე".

2025 წლის აპრილში ბრენდს ბრალი წაუყენეს გაუპატიურებაში, უხამს თავდასხმასა და სექსუალურ ძალადობაში ოთხი სხვადასხვა ქალის მიმართ. ინციდენტები, სავარაუდოდ, 1999-დან 2005 წლამდე პერიოდში ხდებოდა. იმავე წლის დეკემბერში მას კიდევ ორი ბრალდება დაემატა 2009 წელს მომხდარ შემთხვევებთან დაკავშირებით. ბრენდი ყველა ბრალდებაში თავს უდანაშაულოდ მიიჩნევს.

მისი სასამართლო პროცესი ლონდონის საუთვორკის სამეფო სასამართლოში თავდაპირველად 16 ივნისს უნდა დაწყებულიყო, თუმცა გასულ თვეში ის 12 ოქტომბრისთვის გადაიდო.