"სამართლიანი არჩევნების" დახმარებით კიდევ ერთმა მოქალაქემ შეძლო საკუთარი შრომითი უფლებების დაცვა. 2026 წლის 30 იანვარს ქუთაისის საქალაქო სასამართლომ დავით კახიძის საქმეზე მხარეთა შორის მორიგება დაამტკიცა. სასამართლოს განჩინებით საქმის წარმოება შეწყდა, ხოლო მოპასუხე შპს "საქნახშირს" მოსარჩელე კახიძის სასარგებლოდ კომპენსაციის გადახდა დაეკისრა.

დავით კახიძე შპს "საქნახშირში" საშახტო ტრანსპორტის უბნის ვაგონშემკეთებლის პოზიციაზე 2020 წლის 8 სექტემბრიდან მუშაობდა. ის გათავისუფლებას მისი მეუღლის ოპოზიციური პარტიის წევრობას უკავშირედა.

"დავით კახიძე 2020 წლის 8 სექტემბრიდან შპს „საქნახშირში“ საშახტო ტრანსპორტის უბნის ვაგონშემკეთებლის პოზიციაზე მუშაობდა. მასთან შრომითი ხელშეკრულება განუსაზღვრელი ვადით იყო დადებული.

2024 წლის 30 დეკემბერს დასაქმებულისთვის ცნობილი გახდა, რომ მასთან შრომითი ურთიერთობა შეწყდა, რის საფუძვლადაც დამსაქმებელმა რეორგანიზაციის ფარგლებში ჩატარებული გასაუბრების შედეგები მიუთითა. თუმცა, კახიძე სამსახურიდან გათავისუფლებას მისი მეუღლის ოპოზიციური პარტიის წევრობას უკავშირებდა.

დავით კახიძემ აღნიშნული გადაწყვეტილება სასამართლოში გაასაჩივრა. იგი მიუთითებდა, რომ გათავისუფლება მოკლებული იყო სამართლებრივ დასაბუთებას, რის გამოც, მოითხოვა ბრძანების ბათილად ცნობა, სამუშაოზე აღდგენა და იძულებითი განაცდურის ანაზღაურება.

სასამართლო განხილვის პროცესში მხარეებს შორის შედგა შეთანხმება. 2026 წლის 30 იანვარს ქუთაისის საქალაქო სასამართლომ დაამტკიცა მორიგება, რომლის მიხედვითაც, შპს „საქნახშირმა“ აიღო კომპენსაციის გადახდის ვალდებულება. აღსანიშნავია, რომ განჩინებით მოპასუხე მხარეს თანხის ანაზღაურების მკაცრი ვადები განესაზღვრა, რომელთა დარღვევის შემთხვევაშიც სააღსრულებო ფურცელი დაუყოვნებლივ გაიცემა.

აღნიშნული საქმე კიდევ ერთხელ ადასტურებს, რომ რეორგანიზაციის მოტივით დასაქმებულთა გათავისუფლება ხშირად სათანადო სამართლებრივი დასაბუთებისა და ობიექტური კრიტერიუმების გარეშე ხდება. მსგავს შემთხვევებში სასამართლო მექანიზმების გამოყენება და მხარეთა შორის სამართლიანი შეთანხმება მნიშვნელოვანი პრეცედენტია შრომითი უფლებების დაცვის კუთხით.", — ნათქვამია ISFED-ის მიერ გავრცელუბულ განცხადებაში.