სანთლები აანთეთ: ქალაქში კუდიანები ბრუნდებიან და უკვე ის დროა, მათ დასახვედრად მოვემზადოთ — კინოეკრანებზე სულ მალე გამოვა პრაქტიკული მაგია 2! საჰელოუინო კლასიკად ქცეული ფილმი 28 წლის შემდეგ გრძელდება.

გაგრძელებაში ისევ ვიხილავთ ლეგენდარულ დუეტს — მთავარ გმირებს, დებ ოუენსებს, კვლავაც სანდრა ბულოკი და ნიკოლ კიდმანი განასახიერებენ. ასევე ბრუნდებიან დაიან უისტი და სტოკარდ ჩენინგიც, რომლებმაც პირველ ფილმში დების გამზრდელი დეიდები ითამაშეს. ამასთან, პრაქტიკული მაგია 2-ის ქასთში სხვა ნაცნობ სახელებსაც, მაგრამ ახალ პერსონაჟებს ვხვდებით: ფილმში ვიხილავთ არია სტარკის (სატახტოთა თამაში) შემსრულებელ მეისი უილიამსს და თრანდუილის (ჰობიტი) სახედ ქცეულ ლი პეისს.

პრაქტიკული მაგია ეკრანებზე 1998 წელს გამოვიდა. რეჟისორ გრიფინ დანის ნამუშევარი ელის ჰოფმანის ამავე სახელწოდების რომანის ეკრანიზაცია გახლავთ. ნაწარმოები ორ კუდიან დაზე, სალი და ჯილიან ოუენსებზე, გვიყვება. ოუენსები კუდიანების დიდ შტოს წარმოადგენენ, მაგრამ ადრეულ ასაკში დაობლებული დების ცხოვრების ნაწილია საგვარეულო წყევლაც — ვისაც ოუენსების ქალი შეუყვარდება, უდროო სიკვდილისთვისაა განწირული.

საინტერესო ფაქტი ფილმზე: რეჟისორმა გადაღებებისთვის "ნამდვილი ჯადოქარი" აიყვანა კონსულტანტად, რომელმაც მოგვიანებით დამატებითი ანაზღაურება და ფილმის მოგებიდან წილი მოითხოვა. რადგან ამ მოთხოვნას პროდიუსერებმა უარით უპასუხეს, "ჯადოქარს" პროექტიც და გრიფინ დანიც დაუწყევლია.

რაც შეეხება გაგრძელების სიუჟეტს, აქ ამბავი პირველ ფილმში მომხდარი მოვლენებიდან 25 წლის შემდეგ ვითარდება. სალი ოუენსს უკვე ზრდასრული შვილები ჰყავს, ჯილის კი შავ კატასთან ერთად წყნარი ცხოვრება აქვს მოწყობილი. თუმცა, ოჯახის თავს კვლავაც შავი ღრუბელი ჩნდება და ოუენსების წარსული სააშკარაოზე გამოდის. სალის, ჯილიანსა და მათ დეიდებს ისევ მოუწევთ, გაერთიანდნენ და მშობლიური მასაჩუსეტსიდან ბრიტანეთში ჩავიდნენ, რათა თავიანთ საგვარეულო წყევლას ერთხელ და სამუდამოდ მოუღონ ბოლო.

პრაქტიკული მაგია 2-ის რეჟისორი სიუზენ ბიერია, რომელთან ერთადაც კიდმანს უმუშავია ფილმზე The Perfect Couple, ბულოკს კი — თრილერზე Bird Box. ოუენსების ახალი ისტორიის სცენარისტი კვლავაც ოსკაროსანი აკივა გოლდსმენი გახლავთ (ჯორჯა პრიჩეტთან ერთად), კიდმანი და ბულოკი კი პროდიუსერების როლშიც გვევლინებიან.

აღსანიშნავია, რომ პრაქტიკულ მაგიას გამოსვლისთანავე დიდი წარმატება არ მოჰყოლია: $75-მილიონიანი ბიუჯეტის საპირწონედ, ფილმმა მხოლოდ $68,3 მილიონის გამომუშავება შეძლო. თუმცა, დროთა განმავლობაში, ფილმი საკულტო ნაწარმოებად იქცა, რომელიც ჰელოუინის კინომარათონის განუყოფელი ნაწილია.

პრაქტიკული მაგია 2-ის პრემიერა 11 სექტემბერს შედგება.