ალბათ, ხშირად მოგისმენია, რომ ხელოვნური ინტელექტი მალე ყველას ჩაგვანაცვლებს და სამყარო, რომელსაც ვიცნობთ, რადიკალურად შეიცვლება. თუმცა, სინამდვილეში რეალობა ბევრად ნაკლებად დრამატულია: მიუხედავად იმისა, რომ ინდუსტრიების ტექნოლოგიური ტრანსფორმაცია გარდაუვალია, ადამიანურ რესურსსა და შემოქმედებით გონებაზე მოთხოვნა მუდმივად იარსებებს.

იმისთვის, რომ შენი პროფესიული უნარები თანამედროვე ბაზარზე რელევანტური დარჩეს, ნაკლებად შემოქმედებითი საქმე AI-ს უნდა გადააბარო, შენი ენერგია კი ისეთ საკითხებს დაუთმო, რომელთა გადაწყვეტაში ბადალი არ გყავს.

სწორედ ამიტომ, საქართველოს ბანკი, UN Women-თან და Mastercard-თან ერთად, AI სტიპენდიას გთავაზობს. ინიციატივა სპეციალურად ქალებისა და გოგოებისთვისაა. იმისთვის, რომ მათ თანამედროვე ციფრული ინსტრუმენტების ათვისება შეძლონ.

ამ ბლოგში ნუციკო ნებიერიძეზე გიამბობთ. ნუციკო კონტენტ კრეატორია, რომელმაც საქართველოს ბანკის სტიპენდიით ხელოვნური ინტელექტის კურსი გაიარა, რის შემდეგაც მისი ყოველდღიური შემოქმედებითი პროცესი რადიკალურად შეიცვალა.

რატომ გადაწყვიტა ნუციკომ AI შეესწავლა?

ნუციკო ძირითადად სოციალური მედიისთვის ქმნის ვიდეობს. მუშაობს, როგორც კომპანიებთან, ისე კერძო დამკვეთებთან და ინფლუენსერებთან.

ჩემთვის მნიშვნელოვანია, ჩემმა კონტეტმა შექმნას განწყობა, დატოვოს ემოცია, შთააგონოს ის ადამიანი, რომელიც მას უყურებს. ჩემი მთავარი მიზანია, გავიზარდო როგორც კრეატორი, უფრო მასშტაბურ და პროფესიონალურ პროექტებში ჩავერთო და საბოლოოდ, ჩემი სტილი და ხელწერა ფართო აუდიტორიას გავაცნო. — აღნიშნავს ნუციკო ინტერვიუში.

ნუციკომ იცოდა, რომ მიზნების მისაღწევად ტექნოლოგიური განვითარების ტალღას უნდა აჰყოლოდა და AI მოდელებთან დამეგობრებულიყო. კურსის გავლა გადაწყვიტა, რათა შემოქმედებით პროცესში AI ტექნოლოგიები უფრო მოქნილად და ეფექტურად ჩაერთო.

AI ჩემთვის არის ინსტრუმენტი, რომელიც მეხმარება სამუშაო პროცესში: იდეების გენერირებაში, ვიდეოების დაგეგმვასა და კონტენტის შინაარსის გამდიდრებაში. ახლა, იმის გაკეთებას, რასაც ადრე საათები ვანდომებდი უფრო სწრაფად, ეფექტურად და ჩემებურად, ორიგინალურად ვახერხებ.

სტიპენდიისა და კურსის შესახებ

სტიპენდიის შესახებ ნუციკომ ინფორმაცია სოციალურ ქსელში ნახა. აპლიკაცია ბოლო დღეს შეავსო, იგრძნო, რომ კურსზე ერთ-ერთი ადგილი მას ეკუთვნოდა. სამოტივაციოც გულწრფელად და ზედმეტი სირთულეების გარეშე დაწერა.

რაც შეეხება AI კურსს, მან მოლოდინები სრულად გაამართლა. როგორც თავად იხსენებს, მანამდე ეგონა, რომ AI-სთან საერთო ენის გამონახვა მხოლოდ მას უჭირდა:

ხანდახან ვფიქრობდი, ერთადერთი ვარ, ვინც საერთო ენას ვერ პოულობს ხელოვნურ ინტელექტთან-მეთქი. დავალებას მივცემდი, ვერ მიგებდა, მერე ვბრაზდებოდი და ვთიშავდი. კურსზე ვისწავლე რაშიც იყო პრობლემა, როგორ უნდა დამეფორმირებინა სწორად დავალება იმისთვის, რომ ჩემსა და AI-ს შორის დიალოგი შემდგარიყო.

ამჟამად ნუციკო ხელოვნურ ინტელექტს აქტიურად იყენებს იდეების გენერირების, ტექსტების შედგენისა და სცენარების დაგეგმვის პროცესში. პარალელურად, ის თავის მოვლისა და სილამაზის (Skincare/Beauty) მიმართულებით სატესტო პროექტზე მუშაობს.

ვგეგმავ, შევქმნა კამპანიები და კონტენტი, რომლებსაც კომპანიებს მომსახურებასთან ერთად უკვე მზა სახით შევთავაზებ. ამ ჩანაფიქრის განხორციელებაში კი AI ძალიან დამეხმარება. სწორედ მასთან ერთად ვაპირებ პროდუქტის ვიზუალიზაციას.

თუ შენც გსურს, თანამედროვე ტექნოლოგიები შენი პროფესიული დღის წესრიგის ნაწილად აქციო, თვალი ადევნე ვებგვერდს და განათლების გზაზე არ გაჩერდე!