ენმ-ს წევრი ლევან სანიკიძე ქართული ოცნების ახალგაზრდულ კონფერენციაზე ცოტნე ივანიშვილის განცხადებას ეხმაურება, რომლითაც მან დაგმო ძალადობა თბილისში მიმდინარე აქციების მონაწილეებზე. სანიკიძე წერს, რომ სწორედ ცოტნე ივანიშვილის მამა, "ბიძინა ივანიშვილია ის მოძალადე, რომელსაც ის [ცოტნე] უნდა გაემიჯნოს", რადგან მისი "დავალებით სცემდნენ ახალგაზრდებს საკუთარ სადარბაზოებთან". ამიტომ ურჩევს, რომ დისკუსია საკუთარ სახლში გახსნას.

"ცოტნე, იმედია კარგად გაქვს გააზრებული, რომ მამაშენია ის მოძალადე, რომელსაც უნდა გაემიჯნო. რთულია, მაგრამ ასეა.

კი ცოტნე, მამაშენის ბრძანებით აფურთხებდნენ სახეში შენს თანატოლებს ე.წ “წამების მანქანებში”.

კი ცოტნე, მამაშენის დავალებით ასახიჩრებდნენ ამ ქვეყნის მომავალს.

კი ცოტნე, მამაშენის დავალებით სცემდნენ ახალგაზრდებს საკუთარ სადარბაზოებთან.

კი ცოტნე, მამაშენის დავალებით ავიწროებდნენ სექსუალურად ქალებს პოლიციის განყოფილებებში.

კი ცოტნე, მამაშენის დავალებით ჩასვეს ციხეში 100-ზე მეტი უდანაშაულო ადამიანი, უმრავლესობა შენი ხნისაა.

კი ცოტნე, მამაშენის დავალებით გადაუხვია ამ ქვეყანამ ევროპული გზიდან.

კი ცოტნე, მამაშენი აიძულებს ყოველთვიურად ათასობით ახალგაზრდას, რომ მომავალი სხვა ქვეყანაში ეძიონ.

კი ცოტნე, მამაშენი გვართმევს მომავალს.

ამიტომ, მოდი დისკუსია საკუთარ სახლში გახსენი, სადაც ამ ქვეყნის, ამ სახელმწიფოს და ამ ქვეყნის მოქალაქეების სიცოცხლით თამაშობთ.

იქნებ ნაკლები ადამიანის გამწარებაში და გაუბედურებაში დაარწმუნო ბატონი ბიძინა.
და გახსოვდეთ, საქართველო არ არის ივანიშვილების საკუთრება!", — დაწერა ლევან სანიკიძემ სოციალურ ქსელში.

ცნობისათვის, 18 აპრილს ქართული ოცნების ახალგაზრდულ კონფერენციაზე ქართული ოცნების საპატიო თავმჯდომარის, ბიძინა ივანიშვილის შვილმა, ცოტნე ივანიშვილმა განაცხადა, რომ გული სტკივა ქვეყანაში არსებულ ძალადობის ფაქტებზე და "გმობს ძალადობას".