ესპანელმა რეჟისორმა, პედრო ალმოდოვარმა, ჯეიკობ ელორდის სამსახიობო კარიერაზე ისაუბრა. ალმოდოვარის თქმით, კითხვის ნიშანს ბადებს ის საკითხი, რამდენად წარმოაჩენს ელორდი თავის სრულ სამსახიობო შესაძლებლობებს.

eსპანურენოვან პოდკასტში სტუმრობისას რეჟისორს ჰკითხეს, განიხილავდა თუ არა ელორდის თავის მომავალ პროექტებში, რის საპასუხოდაც მან მსახიობის კარიერაზე ისაუბრა.

ფოტო: The Australian

რეჟისორის თქმით, ორი აზრი არ არსებობს იმაზე, რომ ავსტრალიელი მსახიობი დიდი ვარსკვლავი გახდება. თუმცა, ალმოდოვარმა აღიარა, რომ კვლავ უჭირს მსახიობის შეფასება, რაც ბადებს კითხვას — ელორდი სექსსიმბოლოა, თუ უფრო ღრმა და დრამატული შესაძლებლობების მქონე მსახიობი?

"დიდხანს ვფიქრობდი იმაზე, ჯეიკობი უბრალოდ სექსსიმბოლოა თუ დაფასებული მსახიობი", — აღნიშნა ალმოდოვარმა და დაამატა, რომ საბოლოო დასკვნის გამოსატანად ელორდის ნახვა სჭირდება ისეთ როლში, რომელიც მისგან მეტ დატვირთვას მოითხოვს.

ფოტო: Chanel

რეჟისორმა ელორდის ბოლო პროექტებიც გააკრიტიკა და აღნიშნა, რომ ისინი საერთოდ არ გვაჩვენებს მსახიობის სრულ შესაძლებლობას. ალმოდოვარმა ყურადღება გაამახვილა ქარიშხლიან უღელტეხილზე და აღნიშნა, რომ თავად ფილმი "ძალიან ცუდი" იყო.

"ჩვენ — ან ყოველ შემთხვევაში, მე მაინც — ელორდი სხვა ისეთ როლში უნდა ვნახოთ, რომელიც მისგან გაცილებით მეტს მოითხოვს", — ამბობს რეჟისორი.

რაც შეეხება ელორდის, ის ნამდვილად კარიერის მწვერვალზეა და წელს ფრანკენშტაინში შესრულებული როლისთვის ოსკარის ნომინაციაც კი დაიმსახურა. გარდა ამისა, ჯეიკობს სულ მალე სამეცნიერო ფანტასტიკის ჟანრის ახალ ფილმში, The Dog Stars-ში, ვიხილავთ, რომლის პრემიერის თარიღი 2026 წლის 28 აგვისტოა. მანამდე კი მის ნახვას Euphoria-ს მესამე სეზონში შეძლებთ.