აშშ-ის პრეზიდენტის, დონალდ ტრამპის განცხადებით, ლიბანსა და ისრაელს შორის 10-დღიანი ცეცხლის შეწყვეტის შეთანხმება ოფიციალურად 17 აპრილს ადგილობრივი დროით 00:00 საათზე უნდა შესულიყო ძალაში.

"ახლახან შესანიშნავი საუბრები მქონდა ლიბანის ღრმად პატივცემულ პრეზიდენტთან, ჟოზეფ აუნთან და ისრაელის პრემიერმინისტრთან, ბენიამინ ნეთანიაჰუსთან. ამ ორმა ლიდერმა თანხმობა განაცხადა, რომ მათ ქვეყნებს შორის მშვიდობის მისაღწევად, ფორმალურად დაიწყონ 10-დღიანი ცეცხლის შეწყვეტის შეთანხმება, რომელიც ძალაში 17 აპრილს ადგილობრივი დროით 00:00 საათზე შევა.

სამშაბათს, ბოლო 34 წლის განმავლობაში პირველად, ორი ქვეყანა ერთმანეთს აქ, ვაშინგტონში შეხვდა, ჩვენს დიდებულ სახელმწიფო მდივანთან, მარკო რუბიოსთან ერთად. მე დავავალე ვიცე-პრეზიდენტ ჯეი დი ვენსს და სახელმწიფო მდივან რუბიოს, აშშ-ის არმიის შტაბების მეთაურთა გაერთიანებული კომიტეტის ხელმძღვანელთან, დენ "რეიზინ“ კეინთან ერთად, იმუშაონ ისრაელთან და ლიბანთან ხანგრძლივი მშვიდობის მისაღწევად.

ჩემთვის დიდი პატივია, რომ მსოფლიოს მასშტაბით უკვე 9 ომი დავასრულე, ეს კი ჩემი მე-10 დასრულებული ომი იქნება, ასე რომ — მივიყვანოთ საქმე ბოლომდე!", — დაწერა დონალდ ტრამპმა სოციალურ ქსელში.

ლიბანში 10-დღიანი ზავის ამოქმედებიდან რამდენიმე საათში, ლიბანის არმიამ ისრაელი ცეცხლის შეწყვეტის შეთანხმების დარღვევაში დაადანაშაულა და ქვეყნის სამხრეთში პერიოდული საარტილერიო ცეცხლის შესახებ განაცხადა. პრემიერმინისტრმა ბენიამინ ნეთანიაჰუმ აღნიშნა, რომ ისრაელის ძალები არ დატოვებენ პოზიციებს სამხრეთ ლიბანში, ხოლო "ჰეზბოლას" ოფიციალურმა პირებმა გააფრთხილა მხარეები, რომ დაჯგუფება იტოვებს თავდასხმებზე პასუხის გაცემის უფლებას, — წერს CNN.

აშშ-ის პრეზიდენტმა დონალდ ტრამპმა განაცხადა, რომ ისრაელისა და ლიბანის წარმომადგენლების შეხვედრა თეთრ სახლში, შესაძლოა, უახლოეს ორ კვირაში შედგეს. კონფლიქტი "ჰეზბოლასთან" აშშ-ირანის ომის მოლაპარაკებების ერთ-ერთი საკვანძო და პრობლემური საკითხია. ტრამპმა ხუთშაბათს ასევე გამოთქვა რწმენა, რომ თეირანთან შეთანხმება მალე მიიღწევა და აღნიშნა, რომ მოლაპარაკებების მორიგი რაუნდი, შესაძლოა, ამ უქმეებზე გაიმართოს.