ცესკოს პრეს-სპიკერის, ანა მიქელაძის განცხადებით, ხმის მიცემის პრიცესი მშვიდ ვითარებაში მიმდინარეობს და ამომრჩევლები დაბრკოლებების გარეშე აძლევენ ხმას:

"10 საათის მდგომარეობით, ამომრჩეველთა აქტივობამ შეადგინა 6 პროცენტი, რაც არის საერთო რაოდენობის 6% და რაოდენობრივად არის 231 736 ამომრჩეველი".

მთელი საქართველოს მასშტაბით, ოკუპირებული ტერიტორიების გარდა, საარჩევნო უბნები დილის 7 საათზე გაიხსნა, მოქალაქეებმა კი ხმის მიცემა 8 საათიდან დაიწყეს. საქართველოს მოსახლეობა დღეს ქალაქის მერებსა და საკრებულოებს ირჩევს.

ცენტრალური საარჩევნო კომისიის ცნობთ, ადგილობრივ თვითმმართველობის არჩევნებზე რეგისტრირებულია 71 ადგილობრივი და 30 საერთაშორისო არასამთავრობო ორგანიზაცია.

2017 წლის ადგილობრივი თვითმმართველობის არჩევნებს 82 ქართული და საერთაშორისო მედიასაშუალების რამდენიმე ასეული ჟურნალისტი გააშუქებს.

ხმის მიცემა შეწყდება საღამოს, 20 საათზე, რამდენიმე საათში კი დაიწყება წინასწარი შედეგების გამოქვეყნება.

დღის განმავლობაში ცენტრალურ საარჩევნო კომისიაში დაგეგმილია არაერთი საინფორმაციო ბრიფინგი. არჩევნების მიმდინარეობაზე მოსახლეობას რეგულარულად მიაწვდიან ინფორმაციას დამკვირვებელი არასამთავრობო ორგანიზაციები. არჩევნების მეორე დღეს კი ისინი ხმის პარალელური დათვლის შედეგებს გამოაქვეყნებს.

არჩევნებს აშუქებს On.ge-ს გუნდიც. ნებისმიერი ინფორმაცია და ფოტო-მასალა, რომელიც მიგაჩნიათ, რომ უნდა მივიდეს ფართო აუდიტორიამდე, გამოგვიგზავნეთ ჩვენ ელ. ფოსტაზე [email protected], ან ფეისბუკ გვერდზე.