ჩეჩნეთის ლიდერმა რამზან კადიროვმა პირველად გააკეთა საჯარო კომენტარი იმ ავტოსაგზაო შემთხვევის შესახებ, რომელშიც, რამდენიმე დამოუკიდებელი მედიის ცნობით, მისი ვაჟი ადამ კადიროვი მოყვა. მან პირდაპირ არ უარყო ეს ცნობები, თუმცა "უცნობი წყაროდან გაჟონილ ინფორმაციად" მოიხსენია, რომელიც "მსოფლიო მედიაში ნომერ პირველ თემად იქცა". ამის შესახებ ინფორმაციას OC media ავრცელებს.

"ხელოვნური ინტელექტის დახმარებით დღეს ნებისმიერს შეუძლია ვინმე მოატყუოს. ქვეყანაში 128 000 საგზაო შემთხვევა მოხდა, 13 009 ადამიანი დაიღუპა, მაგრამ არავინ აქცევს ამას ყურადღებას, არავინ საუბრობს ამაზე," — თქვა კადიროვმა ჩეჩნეთის გენერალურ პროკურორ არსან ადაევთან შეხვედრის დროს.

OC media წერს, რომ კადიროვს არ წარმოუდგენია არცერთი დეტალი, რომელიც ავარიის ფაქტს უარყოფდა.

ავარიის შესახებ ცნობების გავრცელების შემდეგ, ადამ კადიროვის ოფიციალურ ანგარიშებსა და სხვა სახელმწიფო მოხელეების გვერდებზე პოსტები გამოჩნდა, სადაც ჩეჩნეთის ლიდერის შვილი ჩანდა, თუმცა მოგვიანებით გაირკვა, რომ ყველა ეს მასალა არქივიდან იყო აღებული.

გავრცელებული ინფორმაციით, ავარია 16 იანვარს მოხდა. ჩეჩნეთის ხელისუფლებასა და სახელმწიფო მედიას ინციდენტზე ამ დრომდე ოფიციალური ინფორმაცია არ გაუვრცელებიათ.