"ერთმა სასულიერო პირმა მომწერა უცხოეთიდან, ვლოცულობთო, რომ თქვენო გახდეთო [პატრიარქი] და მე მას ვუპასუხე, რომ ვილოცოთ იმისთვის, რომ ყოველი არის ღვთის ნება", — ამის შესახებ ნიქოზის ეკლესიაში ქადაგებისას ნიქოზისა და ცხინვალის მიტროპოლიტმა ისაიამ ქადაგებისას თქვა. მისივე განცხადებით, პატრიარქის "არჩევნები მოდის და არავინ დასახელებულა ჯერ საერთოდ, რადგან ამას თავისი დრო აქვს". მისი ქადაგებიდან ნაწყვეტს "ქართლის ამბები" ავრცელებს.

"ჯვარცმის გზა განვლო უწმინდესმა ღვთისა და თავის ხალხის სამსახურში. მადლობას ვეტყვი უწმინდესს და ასევე მადლობას ვეტყვით მას, რომ იმ დროში გამოარჩია მოსაყდრე, რომელმაც 8 წელი გასწია სამსახური, მასაც მადლობა იმისთვის, ასევე რთულ დროში ატარა ეს ჯვარი და მადლობას ვეტყვით მეუფე შიოს თავისი ღვაწლისა და თავისი მსახურებისთვის.

ტელევიზია და საინფორმაციო წყაროები ყველასთვის ხელმისაწვდომია და იცით, რომ არჩევნები მოდის და არავინ დასახელებულა ჯერ საერთოდ, ამას თავისი დრო აქვს, როცა უნდა მოხდეს ეს ამბავი. ერთმა სასულიერო პირმა მომწერა უცხოეთიდან, ვლოცულობთო, რომ თქვენო გახდეთო [პატრიარქი] და მე მას ვუპასუხე, რომ ვილოცოთ იმისთვის, რომ ყოველი არის ღვთის ნება. უფლის ნება როგორი არის, ეს არის მთავარი და თქვენც ამას გთხოვთ, რომ ილოცოთ, გამოარჩიოს უფალმა ის ადამიანი, რომელიც ამ გოლგოთაზე ღვთის ნებით უნდა ავიდეს.

სასიხარულო ამაში არაფერი არ არის, ეს არის ჯვარი, რომელიც ადამიანს უფალმა უნდა დააკისროს. ვისაც დააკისრებს ალბათ, ამაზე არ უნდა თქვას უარი... ვერავინ ვერ იტვირთებს, თუ ღვთის შეწევნა არ იქნება. თუ უფალი არ შეეწია ადამიანს, ვერც ჩვენი უწმინდესი ვერ შეძლებდა ამას, მას რომ ღვთის შეწევნა არ ჰქონოდა. ამდენად, ინებოს უფალმა, რომ გამოარჩიოს ის, ვინც მისთვის არის საჭირო, ვისაც ის ხედავს", — ამის შესახებ ნიქოზის ეკლესიაში ქადაგებისას ნიქოზისა და ცხინვალის მიტროპოლიტმა ისაიამ ქადაგებისას თქვა. მისი ქადაგებიდან ნაწყვეტს "ქართლის ამბები" ავრცელებს.