ნიქოზისა და ცხინვალის მიტროპოლიტი ისაია არ ადასტურებს გავრცელებულ ინფორმაციას იმის შესახებ, რომ მან საპატრიარქო ტახტის მოსაყდრე შიოს (მუჯირი) სასარგებლოდ კანდიდატურა მოხსნა. ამის შესახებ ინფორმაციას "ნეტგაზეთი" ავრცელებს.

მათ მეუფე ისაიამ მისწერა: "ამ საკითხზე მე არავისთან მისაუბრია". ხოლო დამაზუსტებელ კითხვაზე დაამატა — "თუ არავისთან მისაუბრია, როგორ მოვხსნიდი?".

ინფორმაცია იმის შესახებ, რომ ნიქოზისა და ცხინვალის მიტროპოლიტმა ისაიმ კანდიდატურა საპატრიარქო ტახტის მოსაყდრე შიოს (მუჯირი) სასარგებლოდ მოხსნა, მთავრობის პროპაგანდისტმა მომღერალმა გია გაჩეჩილაძემ, იგივე "უცნობმა" გაავრცელა.

"ყველამ უნდა მოხსნას კანდიდატურა შიოს სასარგებლოდ, მე თუ მკითხავთ. და ვინც დარჩება და არ მოხსნის, აი, ისინი არიან მოღალატეები. დიდი მადლობა მეუფეო, რომ თქვენ არსებობთ და ეს მაგალითი მიეცით ყველას, რა უნდა გააკეთოს სინოდის წევრებმა. ჩუმად გააკეთეთ, მაგრამ ძალიან მაგარი რამე გააკეთეთ", — განაცხადა გია გაჩეჩილაძემ.

დმანისისა და აგარაკ-ტაშირის მთავარეპისკოპოსმა ზენონ იარაჯულმა ტელეკომპანია "ფორმულას" ეთერში განაცხადა, რომ პატრიარქს ჰყავს ეპისკოპოსები, რომლებიც 60 წელზე მეტის არიან, რომელთაგან ორს თავად ისურვებდა, რომ პატრიარქობის "ტვირთი აიღოს". მისივე თქმით, ამ კანდიდატებს შორის საპატრიარქო ტახტის მოსაყდრე შიო არ არის.

"მე ეგენი [პატრიარქობა] არ მაინტერესებს, მე ვარ უფრო იდეური ადამიანი. მე ამ მაიმუნობებთან რა საქმე მაქვს, ინტრიგებთან, რომელიც ყოველდღიურობაში ხდება ცხოვრებაში. არასდროს მე ლიდერის, პირველი პირობის სურვილი არც გამჩენია, არც მექნება. ...გარდა ჩემი აზრისა, პატრიარქსაც სურვილი ჰქონდა, საუბარი როცა იყო… არის ასეთი ეპისკოპოსები, ჰყავს პატრიარქს, ოღონდ ცოტა 60 წელზე მეტის არიან, რომელთაგან ორს მე ვისურვებდი, რომ ეს ტვირთი აიღოს, თუ ისინი ამას შეძლებენ. თუ ღმერთი ამას ინებებს და მას მისცემს ამ ჯვარს და ამ ტვირთს, გაიგებთ და იტყვით, რომ რა სწორი იყოო", – განაცხადა მთავარეპისკოპოსმა ზენონმა.

საპატრიარქო ტახტის მოსაყდრე, სენაკისა და ჩხოროწყუს მიტროპოლიტ შიოზე საუბრისას მან თქვა, რომ პატრიარქობა "ძალიან დიდი ტვირთია და თუ თვითონ მას უნდა პატრიარქობა და შეძლებს, ღმერთმა ხელი მოუმართოს".

სრულიად საქართველოს კათოლიკოს-პატრიარქი ილია მეორე დღეს, 22 მარტს სიონის საკათედრო ტაძარში დაკრძალეს. ის 17 მარტს, 93 წლის ასაკში გარდაიცვალა.

საქართველოს ავტოკეფალიური მართლმადიდებელი ეკლესიის მართვა-გამგეობის დებულების მიხედვით, პატრიარქის გარდაცვალებიდან 40 დღის შემდეგ, მაგრამ არა უგვიანეს 2 თვისა, საპატრიარქო ტახტის მოსაყდრე იწვევს საქართველოს ეკლესიის გაფართოებულ კრებას, რომელზედაც მოხდება სრულიად საქართველოს კათოლიკოს-პატრიარქის არჩევა.

საქართველოს ეკლესიის გაფართოებული კრების წინ მოსაყდრე იწვევს წმინდა სინოდს, საპატრიარქო კანდიდატების შესარჩევად. წმინდა სინოდი ირჩევს გაფართოებულ კრებაზე წარსადგენ 3 კანდიდატს. წმინდა სინოდის ყველა წევრს აქვს უფლება წარმოადგინოს ერთი საპატრიარქო კანდიდატი, მათ შორის თავისი თავიც. სინოდში ახლა 39 წევრია. ხმოსნების არსებული რაოდენობით პატრიარქად ასარჩევად კანდიდატმა მინიმუმ 20 ხმა უნდა დააგროვოს.

სამი საპატრიარქო კანდიდატი, რომლებიც მიიღებენ ხმათა უმრავლესობას, კენჭს იყრიან გაფართოებულ კრებაზე, როგორც პატრიარქობის კანდიდატები. გაფართოებული კრების ყველა მონაწილეს აქვს უფლება გამოთქვას აზრი კანდიდატთა შესახებ.

კათოლიკოს-პატრიარქის არჩევის კენჭისყრაში მონაწილეობას იღებენ მხოლოდ მღვდელმთავრები.

სრულიად საქართველოს კათოლიკოს-პატრიარქად არჩეულად ჩაითვლება ის კანდიდატი, რომელიც მიიღებს კრების მონაწილე მღვდელმთავართა ხმების ნახევარზე მეტს. თუ ვერცერთი კანდიდატი ვერ მიიღებს ხმათა ნახევარზე მეტს, ტარდება ხელმეორე კენჭისყრა, რომელშიც მონაწილეობას მიიღებს ის ორი კანდიდატი, რომელიც პირველ კენჭისყრაში მიიღებს ხმათა უმრავლესობას.

სრულიად საქართველოს კათოლიკოს-პატრიარქის აღსაყდრება (ინტრონიზაცია) ხდება მცხეთის სვეტიცხოვლის წმინდა ათორმეტთა მოციქულთა სახელობის საპატრიარქო ტაძარში.

სრულიად საქართველოს კათოლიკოს-პატრიარქის არჩევა მართლმადიდებლური ტრადიციის თანახმად ხდება სამუდამოდ (კათოლიკოს-პატრიარქის გარდაცვალებამდე).

სრულიად საქართველოს კათოლიკოს-პატრიარქობის კანდიდატი უნდა აკმაყოფილებდეს შემდეგ მოთხოვნებს:

1. ეროვნებით უნდა იყოს ქართველი, უნდა იყოს საქართველოს მართლმადიდებელი ეკლესიის მღვდელმთავარი;

2. უნდა ჰქონდეს საღვთისმეტყველო განათლება და საეკლესიო მმართველობის საკმარისი გამოცდილება;

3. ასაკით უნდა იყოს არანაკლებ 40 წლისა და არაუმეტეს 70 წლისა, უნდა იყოს ბერი.

ტელეკომპანია "ფორმულას" ცნობით, სინოდის 39 წევრიდან 9 მათგანი 70-ს გადაცილებულია.