კავკასიის მედიცინის ცენტრში მყოფი სრულიად საქართველოს კათალიკოს-პატრიარქი ილია II ირაკლი კობახიძემ და შალვა პაპუაშვილმა მოინახულეს. მათ პატრიარქს ჯანმრთელობა უსურვეს და მადლობა გადაუხადეს ექიმებს იმისათვის, რომ სათანადოდ ზრუნავენ პატრიარქის ჯანმრთელობაზე.

"მე რომ გავაკეთო პატრიარქის ჯანმრთელობის მდგომარეობაზე განცხადება, ალბათ არასწორი იქნება. გამოვლენ კლინიკის, კონსილიუმის წარმომადგენლები და ისინი გააკეთებენ, ბუნებრივია, კომენტარს.

მე მინდა პატრიარქს ჯანმრთელობა ვუსურვო და მადლობას გადავუხდი ექიმებს. ყველა არის ბოლომდე ჩართული. მაქსიმუმს აკეთებენ იმისთვის, რომ სათანადოდ იზრუნონ პატრიარქის ჯანმრთელობაზე. მადლობა ასევე მინისტრს, რომელიც ბოლომდეა ამ ყველაფერში ჩართული და სახელმწიფო, რა თქმა უნდა, ყველაფერს გააკეთებს იმისთვის, რომ გაგრძელდეს მაქსიმალური ზრუნვა პატრიარქის ჯანმრთელობაზე. ყველაფერზე ჯანდაცვის მინისტრი, კონსილიუმი გააკეთებს განცხადებას", — განაცხადა ირაკლი კობახიძემ

"დეტალურ ინფორმაციას, რა თქმა უნდა, ექიმი მოგაწვდით, მე ამ საკითხზე ვერ ვისაუბრებ. თუმცა, მნიშვნელოვანია, რომ ჩვენ ყველამ ერთად უნდა ვილოცოთ ჩვენი პატრიარქისთვის, ვუსურვოთ მას სიმხნევე და გამოჯანმრთელება. ახლა მნიშვნელოვანია ყველანი ერთად ვიდგეთ, მისთვის ვილოცოთ. იცით, რომ კონსილიუმი იყო, განიხილავენ საკითხებს, თუ რა როგორ უნდა გადაწყდეს.

ყველაფერს აკეთებს სახელმწიფოც, ჯანდაცვის სამინისტრო. ყველაფერს აკეთებს თითოეული ექიმი და ყველაფერი გაკეთდება იმისთვის, რომ სამედიცინო ჩარევით შესაძლებელი გახდეს მისი ჯანმრთელობის გამოსწორება," — განაცხადა შალვა პაპუაშვილმა.

ილია II-ის ჯანმრთელობის მდგომარეობა წუხელ გვიან ღამით გაუარესდა. როგორც კავკასიის მედიცინის ცენტრის დირექტორმა, სოფიო ასპანიძემ განაცხადა, პატრიარქი კლინიკაში კუჭიდან მასიური სისხლდენით შეიყვანეს.