უკრაინის პრეზიდენტმა, ვოლოდიმირ ზელენსკიმ ხელი მოაწერა განკარგულებას ეროვნული უსაფრთხოებისა და თავდაცვის საბჭოს გადაწყვეტილების აღსრულების შესახებ, რომელიც ბელარუსის პრეზიდენტის, ალექსანდრე ლუკაშენკოს წინააღმდეგ სანქციების დაწესებას ითვალისწინებს. ამის შესახებ ინფორმაციას პრეზიდენტის აპარატი ავრცელებს.

უკრაინამ სანქციები 2025 წლის მეორე ნახევარში მოიერიშე დრონების სამართავი სარეტრანსლაციო სადგურების სისტემის განლაგების გამო დააწესა.

ვოლოდიმირ ზელენსკიმ განაცხადა, რომ ბელარუსის ტერიტორიაზე ვითარდება ინფრასტრუქტურა საშუალო სიშორის რაკეტების — "ორეშნიკის", განსათავსებლად, რაც მისივე განმარტებით საფრთხეს წარმოადგენს, როგორც უკრაინელებისთვის, ასევე ყველა ევროპელისთვის.

"ასევე ვითარდება ინფრასტრუქტურა ბელარუსის ტერიტორიაზე საშუალო სიშორის რაკეტების, "ორეშნიკის", განსათავსებლად, რაც აშკარა საფრთხეს წარმოადგენს არა მხოლოდ უკრაინელებისთვის, არამედ ყველა ევროპელისთვის. ალექსანდრ ლუკაშენკომ არა მხოლოდ დაუშვა "ორეშნიკის" განლაგება ბელარუსის ტერიტორიაზე, არამედ გასულ წელს ქვეყნის საწარმოებმა რუსეთს ამ იარაღისთვის საჭირო კრიტიკული კომპონენტები, ნაწილები და საწარმოო ბაზა მიაწოდეს . ეს პროცესი 2026 წელსაც გრძელდება. ალექსანდრე ლუკაშენკო დიდი ხანია ყიდის ბელარუსის სუვერენიტეტს საკუთარი ძალაუფლების შესანარჩუნებლად," — აღნიშნა ვოლოდიმირ ზელენსკიმ.

განცხადებაში ასევე აღნიშნულია, რომ ალექსანდრე ლუკაშენკომ ხელი შეუწყო ბელარუსი მაღალჩინოსნების ჩართვას უკრაინელი ბავშვების რუსეთში იძულებით დეპორტაციაში.

ალექსანდრე ლუკაშენკოს წინააღმდეგ სანქციები უკვე დაწესებული აქვთ ევროკავშირს, აშშ-ს, იაპონიას, კანადას, შვეიცარიასა და ახალ ზელანდიას საყოველთაოდ აღიარებული ადამიანის უფლებების სისტემატური დარღვევის, პოლიტიკური ოპონენტების წინააღმდეგ სახელმწიფო რეპრესიების ორგანიზებისა და უკრაინის წინააღმდეგ რუსეთის აგრესიის დახმარების გამო.