გამოკითხულ უკრაინელთა 52% დონბასის რუსეთისთვის გადაცემას უსაფრთხოების გარანტიების სანაცვლოდ ეწინააღმდეგება, ხოლო 40% მხარს უჭერს, ასეთია კიევის საერთაშორისო სოციოლოგიის ინსტიტუტის გამოკითხვის შედეგები. ამავე კვლევის მიხედვით, 7%-ს პასუხი არ აქვს.

სოციოლოგები აღნიშნავენ, რომ იანვრის ბოლო ორი კვირის განმავლობაში, უკრაინაში მასშტაბური დაბომბვისა და ელექტროენერგიისა და გათბობის მიწოდების პრობლემების მიუხედავად, მშვიდობის ამ მოთხოვნის მხარდაჭერა არ გაზრდილა.

კიევის მაცხოვრებლებს შორის 59% დონბასის დათმობას კატეგორიულად მიუღებლად მიიჩნევს, ხოლო 31% მზადაა მიიღოს ეს პირობა მშვიდობის სანაცვლოდ. ქვეყნის დასავლეთში 57% კატეგორიულად წინააღმდეგია, ხოლო 38% მზადაა ამ დათმობაზე წავიდეს; ცენტრალურ და ჩრდილოეთ რეგიონებში ეს მაჩვენებლები 49%-სა და 42%-ს შეადგენს; სამხრეთში — 49%-სა და 44%-ს; ხოლო აღმოსავლეთში — 50%-სა და 39%-ს.

"ევროპეისკაია პრავდა" წერს, რომ გამოკითხვა ჩატარდა 23-დან 29 იანვრამდე, მობილური ტელეფონის ნომრების შემთხვევითი შერჩევის საფუძველზე, სატელეფონო ინტერვიუების გამოყენებით, უკრაინის ყველა რეგიონში, ოკუპირებული ტერიტორიების გარდა. გამოიკითხა 18 წლის და უფროსი ასაკის 1003 უკრაინის მოქალაქე. კვლევის თანახმად ცდომილება არ აღემატება 5.8%-ს.