მარტი მაუზერმა მორიგი კრიტიკული მატჩი წააგო — თუმცა ამჯერად ის არა სპორტულ მოედანზე, არამედ კინოდაჯილდოებაზე დამარცხდა.

ჯოშ საფდის სპორტულმა დრამამ, Marty Supreme, BAFTA-ს წლევანდელი დაჯილდოების ცერემონია არასასურველი შედეგით დატოვა: ფილმმა 11-დან ვერცერთი ნომინაციის მოგება ვერ შეძლო, რითაც ერთ საღამოში ყველაზე მეტი წაგების ისტორიული რეკორდი გაიმეორა.

BAFTA-ს ნომინაციებში Marty Supreme-ის გამარჯვებებზე დიდი მოლოდინები ჰქონდათ — ვარაუდობდნენ, რომ ის რამდენიმე კატეგორიაში აუცილებლად მოიგებდა. მთავარი პერსონაჟის როლის შემსრულებელმა, ტიმოთი შალამემ, ფილმისთვის Critics Choice-სა და ოქროს გლობუსის პრიზები უკვე მოიპოვა. თუმცა, საღამოს ერთ-ერთი ყველაზე დიდი მოულოდნელობა შალამეს რობერტ არამაიოსთან მარცხი აღმოჩნდა.

ფოტო: A24

Marty Supreme-მდე ყველაზე მეტი წაგების რეკორდი ფილმებს — Women in Love (1969)-სა და Finding Neverland (2004)-ს ეკუთვნოდა, რომლებიც ასევე 11 ნომინაციაში დამარცხდნენ. აღსანიშნავია, რომ ორივე მათგანმა მოგვიანებით თითო ოსკარის ჯილდოს მოპოვება მაინც შეძლო.

BAFTA-ს შედეგი განსაკუთრებით მოულოდნელი ფილმის რეჟისორის — ჯოშ საფდისთვის აღმოჩნდა. ის 4 ნომინაციით წლევანდელ დაჯილდოებაზე ყველაზე მეტჯერ ნომინირებული ადამიანი იყო.

ჯოშ საფდი და ტიმოთი შალამე

ჯოშ საფდი და ტიმოთი შალამე

ფოტო: Getty Images

მიუხედავად BAFTA-ს იმედგაცრუებისა, Marty Supreme დაჯილდოებების სეზონში კვლავ სერიოზულ მოთამაშედ რჩება. 2022 წელს, A24-ის კიდევ ერთმა ნამუშევარმა, Everything Everywhere All at Once, BAFTA-ს დაჯილდოებაზე მხოლოდ 1 გამარჯვება მოიპოვა, თუმცა, მოგვიანებით, 7 ოსკარის ჯილდო მიიღო.

ოსკარის დაჯილდოებაზე Marty Supreme 9 ნომინაციაშია წარდგენილი. ოსკარის რიგით 98-ე ცერემონია 15 მარტს გაიმართება.

ასევე იხილეთ: