17 ოქტომბერს, უკრაინაში, ათასობით ადამიანმა აქცია გამართა, პოლიციას დაუპირისპირდა და უკრაინის პარლამენტის მიმდებარედ ათობით კარავი გაშალა. დემონსტრანტები ანტი კორუფციული სასამართლოს შექმნას, სასამართლო დევნისგან კანონმდებლების იმუნიტეტის გაუქმებასა და უფრო სამართლიან საარჩევნო სისტემას მოითხოვენ.

KyivPost-ის ცნობით, დღევანდელი დემონსტრაცია 2013-2014 წლის ევრომაიდანის რევოლუციის შემდეგ ერთ-ერთი ყველაზე დიდია. გამოცემის ცნობით, ადგილზე ექვსი ათასამდე სამართალდამცველია მობილიზებული.

პროტესტის გამო, რადაში საარჩევნო კანონისა და დეპუტატების იმუნიტეტის განხილვა 19 ოქტომბერს ჩაინიშნა, დემონსტრანტები პარლამენტის წინ კენჭისყრამდე დარჩებიან.

აქციის მონაწილეებს, რომლებიც საქართველოს ექს-პრეზიდენტის მხარდამჭერები არიან, და უკრაინის პოლიციას შორის დაპირისპირებაც მოხდა, როცა სამართალდამცავები შეეცადნენ კარვების გაშლაში შეეშალათ ადამიანებისთვის ხელი.

მიხეილ სააკაშვილმა უკრაინის პრეზიდენტ პეტრო პოროშენკოს გადადგომისკენ მოუწოდა, თუ ის დემონსტრანტების მოთხოვნებს არ შეასრულებს:

ფოტო: Volodymyr Petrov

"სანამ პოროშენკო პრეზიდენტის თანამდებობას იკავებს, არ იქნება პროგრესი და კორუფციის წინააღმდეგ ბრძოლა. იქნება სიღარიბე, დამცირება და ემიგრაცია. ევრომაიდანის შემდეგ ოთხი წლის თავზე, სიმართლემ, ბოლოს და ბოლოს, უნდა დაამარცხოს ტყუილი, ანუ ჩვენ უნდა დავამარცხოთ პოროშენკო."

KyivPost-ის ცნობით, აქციას სხვადასხვა პოლიტიკური ძალების და სამოქალაქო ჯგუფების წევრები ესწრებოდნენ.