რეჟისორმა ჯეიმს კამერონმა სენატის ანტიმონოპოლიური ქვეკომიტეტის თავმჯდომარეს, სენატორ მაიკ ლის, წერილი გაუგზავნა, სადაც ამტკიცებს, რომ თუ Netflix წარმატებით შეიძენს Warner Bros.-ის სტუდიასა და სტრიმინგ ბიზნესებს, ეს გამოიწვევს სამუშაო ადგილების მასშტაბურ დაკარგვას, შეცვლის კინოთეატრალურ გარემოს და დააზიანებს ფილმების ექსპორტს.

"მჯერა, რომ Warner Brothers Discovery-ის Netflix-ზე შესაძლო გაყიდვა დამანგრეველი იქნება კინოთეატრალური ფილმების ბიზნესისთვის, რომელსაც ჩემი ცხოვრების დიდი ნაწილი მივუძღვენი", — წერს კამერონი — "რა თქმა უნდა, ჩემი ფილმები შემდეგ ეტაპზე ვიდეო ბაზრებშიც ვრცელდება, მაგრამ ჩემი პირველი სიყვარული კინოა".

ფოტო: JOEL SAGET/AFP/Getty Image

კამერონის პროგნოზით, თუ მისი მსგავსი დიდი ბიუჯეტის ფილმების რაოდენობა შემცირდება, "კინოთეატრები დაიხურება. ნაკლებ ფილმს გადაიღებენ. სამუშაო ადგილების დაკარგვა კი ჯაჭვურ რეაქციას გამოიწვევს".

"Netflix-ის ბიზნესმოდელი პირდაპირ ეწინააღმდეგება კინოთეატრისთვის ფილმების წარმოებისა და ჩვენების სისტემას, რომელიც ასობით ათას ამერიკელს ასაქმებს", — წერს ის — "შესაბამისად, ეს მოდელი ასევე ეწინააღმდეგება Warner Brothers-ის კინოს განყოფილების ბიზნესმოდელს, ერთ-ერთს იმ მცირერიცხოვან დიდ სტუდიათაგან, რომლებიც ჯერ კიდევ შემოგვრჩა".

სენატორმა ლიმ საპასუხოდ განაცხადა: "ჩვენ მივიღეთ წერილები და მიმართვები მსახიობებისგან, რეჟისორებისგან და სხვა დაინტერესებული პირებისგან Netflix-ისა და Warner Brothers-ის შესაძლო გაერთიანებასთან დაკავშირებით და მე ვიზიარებ მათ ბევრ შეშფოთებას. ვგეგმავ დამატებითი მოსმენის გამართვას, რათა ეს საკითხები უფრო დეტალურად განვიხილოთ".

კამერონი ასევე აღნიშნავს, რომ Netflix–Warners-ის გაერთიანება ჰოლივუდური ფილმების ექსპორტსაც დააზარალებს: "აშშ შესაძლოა აღარ იყოს ლიდერი ავტომობილებისა თუ ფოლადის წარმოებაში, მაგრამ ის კვლავ მსოფლიოს ლიდერია კინოში. ეს შეიძლება უარესობისკენ შეიცვალოს".

მსგავსი შინაარსის წერილი აქამდეც გაუგზავნიათ კონგრესისთვის, დეკემბერში კინოპროდიუსერთა ჯგუფმა "სერიოზულ შეშფოთება" გამოთქვა ამ გარიგების გამო. წერილის ავტორებმა "შურისძიების შიშით", ანონიმურობა შეინარჩუნეს.

ნიშნავს თუ არა ეს, რომ Warner Bros.-ის ფილმები კინოთეატრებიდან გაქრება?ნეტფლიქსის განცხადებით — არა. კომპანია გეგმავს Warner Bros.-ის მიმდინარე ოპერაციების შენარჩუნებას, მათ შორის — კინოთეატრებში ფილმების გამოშვების გაგრძელებას. ეს წელიწადში დაახლოებით 15 ფილმის პრემიერას გულისხმობს. თუმცა ინდუსტრიაში ეჭვები კვლავ არსებობს.

ასევე ნახეთ: ნეტფლიქსი Warner Bros. Discovery-ს ყიდულობს — რას ნიშნავს ეს ჩვენთვის?