უკრაინის ანტიკორუფციულმა სასამართლომ უკრაინის ენერგეტიკისა და იუსტიციის ყოფილ მინისტრს, ჰერმან ჰალუშჩენკოს, ორთვიანი წინასწარი პატიმრობა შეუფარდა და გირაოს სახით 200 მილიონი გრივნა (4.6 მლნ დოლარი) დააკისრა. ამის შესახებ ინფორმაციას The Kyiv Independent ავრცელებს.

აღნიშნული გადაწყვეტილება კორუფციულ სკანდალს მოჰყვა, რომელიც სახელმწიფო კომპანია "ენერგოატომს" უკავშირდება და რომელსაც უკრაინის ანტიკორუფციული ბიურო (NABU) იძიებს. ჰალუშჩენკო, რომელიც ქვეყნიდან გასვლის მცდელობისას დააკავეს, კიდევ 8 პირთან ერთად, ფულის გათეთრებასა და ორგანიზებულ დანაშაულშია ბრალდებული.

გამოძიების თანახმად, დანაშაულებრივი სქემა 2021 წლიდან ამოქმედდა და კუნძულ ანგილიასა და მარშალის კუნძულებზე ოფშორულ ქსელს მოიცავდა. პროკურატურა ამტკიცებს, რომ ჯგუფმა 112 მილიონ დოლარზე მეტი გაათეთრა. NABU-ს მიერ გამოქვეყნებული აუდიოჩანაწერების მიხედვით, სადაც ჰალუშჩენკო მოხსენიებულია კოდური სახელებით (მაგალითად, "პროფესორი"), ირკვევა, რომ 7.4 მილიონ დოლარზე მეტი მისი ოჯახის კონტროლირებად ანგარიშებზე გადაირიცხა, ხოლო მილიონობით დოლარი ნაღდი ფულის სახით შვეიცარიაში მის ნათესავებს გაეგზავნათ. ბრალდების მხარის თქმით, ამ თანხით ფინანსდებოდა მინისტრის შვილის განათლება შვეიცარიაში, რაც წლიურად 200 000 დოლარს შეადგენდა. ჰალუშჩენკო ბრალდებას უარყოფს და ამბობს, რომ სწავლის საფასური ანონიმურმა "მდიდარმა ნათლიამ" გადაიხადა.

საქმეში ფიგურირებს პოლიტიკური შურისძიების ეპიზოდიც. პროკურატურის მტკიცებით, იუსტიციის მინისტრობის დროს, ჰალუშჩენკო და მისი მოადგილე უსაფრთხოების სამსახურთან (SBU) ერთად NABU-ს დეტექტივის, რუსლან მაჰამედრასულოვის "გაუსაძლის პირობებში" მოთავსებას გეგმავდნენ. ეს უკანასკნელი სწორედ "ენერგოატომის" საქმეს იძიებდა. ჰალუშჩენკო ამასაც უარყოფს და აცხადებს, რომ მისი სიტყვები კონტექსტიდანაა ამოგლეჯილი.

ყოფილმა მინისტრმა, რომელიც თანამდებობიდან 2024 წლის ნოემბერში გადააყენეს, ბრალდებებს "მანიპულაციური" უწოდა. მიუხედავად იმისა, რომ იგი გირაოს ოდენობის გასაჩივრებას აპირებს, გათავისუფლების შემთხვევაში მას მკაცრი პირობების დაცვა მოუწევს, მათ შორის ელექტრონული სამაჯურის ტარება და პასპორტების ჩაბარება. აღნიშნული საქმე ყველაზე მასშტაბური პოლიტიკური გადაადგილებების მიზეზი გახდა უკრაინაში სრულმასშტაბიანი ომის დაწყების შემდეგ და გამოძიება სხვა მაღალჩინოსნების მიმართაც გრძელდება.