პოტერიადის ჯადოსნურ სამყაროში დაბრუნებამდე იმაზე ცოტა დრო დარჩა, ვიდრე გგონია. ჰარი პოტერის სერიალის გადაღებები აქტიურ ფაზაშია, პირველი სეზონის პრემიერამდე კი წელიწადზე ნაკლები გვაშორებს. ამის მიუხედავად, ჯოან როულინგის წიგნების მორიგ ეკრანიზაციაზე, რომელზეც HBO მუშაობს, მაინცდამაინც ბევრი რამ არ ვიცით — შინაარსობრივ ნაწილზე მაინც. ვიცით მხოლოდ ის, რომ თითოეულ წიგნს სერიალის ერთი სეზონი დაეთმობა და ნაწარმოები მაქსიმალურად ავთენტიკური სახით გაცოცხლდება (რისი გარანტიც თავად როულინგი უნდა იყოს, რომელიც პროექტის აღმასრულებელი პროდიუსერია).

თუმცა, როგორც შევიტყვეთ, სერიალი პირველივე სეზონში მცირედით გადაუხვევს წიგნს. ლოქს პრეტმა, რომელიც ახალ ეკრანიზაციაში დრაკო მალფოის როლს განასახიერებს, გაამხილა, რომ, ფილმისგან განსხვავებით, მეორეხარისხოვან პერსონაჟებს აქ უფრო მეტად მივადევნებთ თვალს. მისი თქმით, წიგნებში მოქმედება მთლიანად ჰარის გარშემო ვითარდება და ფილმებიც მსგავსადაა გადაღებული, მაგრამ სერიალი უფრო მასშტაბურ სიუჟეტურ ხაზებს მოიცავს.

"ყველა მასწავლებელს მათ პირად კაბინეტებში იხილავთ. ასევე იხილავთ დრაკოს შინაურულ გარემოში. ბევრს არ გაგიმხელთ, მაგრამ [მალფოების] სახლის ამ არაჩვეულებრივი სცენებით ჩასწვდებით, როგორია იგი [დრაკო] სინამდვილეში", — ამბობს პრეტი, — "ვფიქრობ, ფილმებში დრაკო სწორხაზოვნადაა ნაჩვენები და ცინიკოს ბოროტმოქმედად გვევლინება, მაგრამ, რეალურად, უფრო მეტია მოსაყოლი — უნდა გავიგოთ, რატომაა ასეთი. ფილმში კი ეს მხოლოდ გაკვრით ჩანს, მაგალითად, მამამისთან ურთიერთობაში. სერიალი ნამდვილად შესანიშნავი გამოდის, ერთი სული მაქვს, როდის იხილავს მას მაყურებელი".

პრეტის ნახსენები პერსონაჟი, დრაკოს მამა, ლუციუს მალფოი, არც პირველ წიგნში ჩანს და არც მის ეკრანიზაციაში. თუმცა, ჯონი ფლინმა, რომელიც ამ პერსონაჟს სერიალში ასახიერებს, დაადასტურა, რომ იგი პირველივე სეზონიდან გამოჩნდება.

"პირველ წიგნში, ფაქტობრივად, არ ვარ. ლუციუსის ხსენებაც კი არაა [ფილოსოფიურ ქვაში], მაგრამ სერიალში თავიდანვე გამოვჩნდები", — ჰყვება მსახიობი, თუმცა, ამატებს, რომ მაინცდამაინც ბევრი სცენა არ აქვს გადასაღები, — "ასე რომ, უცნაურია, როცა გადასაღებ მოედანზე ერთი დღით ვჩნდები, მერე ერთი თვით ვიკარგები, დაბრუნებულს კი ყველა ერთმანეთთან კიდევ უფრო დაახლოებული მხვდება. თუმცა, გადაღებებზე ძალიან კეთილგანწყობილი გარემოა".

ჯონი ფლინს რამდენიმე თვის წინ "გზა დაულოცა" მისმა წინამორბედმა, ჯეისონ აიზეკსმა (ლუციუს მალფოი კინოეკრანიზაციაში). გველისთავიან კვერთხს უკეთესს ვერავის გადავცემდიო, დაწერა მსახიობმა სოციალურ ქსელში და რჩევაც მიაყოლა:

"ელფებთან ფრთხილად იყავი, იმ წაწვეტებულყურებიან მოღალატე ნაბიჭვრებთან. ჰოგვორტსში შევხვდებით".

პოტერიადის სერიალის გადაღებებმა სტარტი შარშან ზაფხულს აიღო. ეკრანიზაციაში ლეგენდარულ ტრიოს — ჰარის, რონს და ჰერმიონს — დომინიკ მაკლაფლინი, ალასტერ სტაუტი და არაბელა სტენტონი განასახიერებენ.

რაც შეეხება შემოქმედებით გუნდს, სერიალზე Game of Thrones-ისა და The Last of Us-ის რეჟისორი, მარკ მაილოდი, მუშაობს. პროექტის შემოქმედებითი ხელმძღვანელი, სცენარისტი და ერთ-ერთი აღმასრულებელი პროდიუსერი კი ფრანჩესკა გარდინერი გახლავთ. გარდინერს აქამდე ისეთ გახმაურებულ სერიალებზე უმუშავია, როგორებიცაა Succession და Killing Eve.

ჰარი პოტერის სერიალის პირველ სეზონს, სავარაუდოდ, მომავალი წლის დასაწყისში ვიხილავთ.

ასევე იხილეთ:

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…