ოცნების ხელისუფლების პრემიერმინისტრის, ირაკლი კობახიძის განცხადებით, ევროინტეგრაციის თემაზე დებატები აუცილებელია, რათა მოქალაქეებს ჰქონდეთ ინფორმაცია "ეკონომიკური კუთხით რა და მინუსები აქვს" მასში გაწევრიანებას.

კობახიძის განმარტებით, ოცნება ევროინტეგრაციისკენ კურსის შეცვლაზე "არ საუბრობს" და დასძინა, რომ მოქალაქეები ტყუილში არიან შეყვანილები "ევროკავშირის წევრი თუ გავხდებით ხვალ გავიღვიძებთ ბრიუსელში". ოცნების პრემიერის განმარტებით, "საქართველოში ეკონომიკა უფრო მეტად გაიზარდა, ვიდრე ევროკავშირში გაწევრიანებულ ქვეყნებში".

"ჩვენ ხელისუფლება, რა თქმა უნდა, არ ვსაუბრობთ კურსის შეცვლაზე. ჩვენ კონსტიტუციაში გვაქვს ეს ჩაწერილი, რომ ევროინტეგრაცია არის ჩვენი კონსტიტუციური ამოცანა. ყველა თემაზე შეიძლება პლუს-მინუსები იყოს განხილული, მათ შორის იმ ყალბი კამპანიების ფონზე, რომელიც წარიმართება. მაგალითად საზოგადოებას აჯერებენ, რომ ეკა გიგაური ერთხელ წარადგენდა დეკლარაციას და ხვალ ვიღვიძებდით ჩელიაბინსკში, ასევე ატყუებენ ადამიანს, რომ ევროკავშირის წევრი თუ გავხდებით, ხვალ გავიღვიძებთ ბრიუსელში – ესეც ჩვეულებრივი ტყუილია. ასევე კლიპებს ავრცელებენ, რომ მას შემდეგ, რაც ესტონეთი ევროკავშირის წევრი გახდა მათი ეკონომიკა ორჯერ გაიზარდა. თქვენ, რომ შეადაროთ ესტონეთის და საქართველოს ეკონომიკის ზრდა, იმ მომენტიდან დღემდე საქართველოში ეკონომიკა უფრო მეტად გაიზარდა ვიდრე ევროკავშირში გაწევრიანებულ ქვეყნებში.

დებატების საგანი არ არის იმის გადახედვა, რაც წერია კონსტიტუციაში. ეს დებატები ადამიანებს მისცემს იმის თქმის საშუალებას, მაგალითად, რომ გავრცელებული ინფორმაცია პირობითად ეკონომიკასთან დაკავშირებით, არის სრული სიყალბე და ამით ცდილობენ ადამიანებში ჭარბი ემოციების გამოწვევას იმისათვის, რომ ეს ჭარბი ემოციები შემდეგ საკუთარი ქვეყნის წინააღმდეგ მიმართონ. ამიტომ, ზუსტად უნდა გაიგოს საზოგადოებამ, ჭარბი მოლოდინები რომ არ შეიქმნას, რა შედეგებს იწვევს ეკონომიკური კუთხით, მაგალითად, ევროინტეგრაცია, რა პლუსები და მინუსები აქვს, სხვა თვალსაზრისით რა პლუს -მინუსები აქვს ევროინტეგრაციას, ამასთან დაკავშირებით მსჯელობა არის აბსოლუტურად მიზანშეწონილი," — განაცხადა კობახიძემ “რუსთავის 2-ის” ეთერში ევროინტეგრაციასთან დაკავშირებით დებატებზე საუბრისას.

ცნობისთვის, დღეს, 22:00 საათზე პროსამთავრობო ტელეკომპანია რუსთავის 2-ის ეთერში ევროინტეგრაციასთან დაკავშირებით დებატები გაიმართება. გადაცემის სტუმრები იქნებიან: ოცნების საპარლამენტო უმრავლესობის ლიდერი ირაკლი კირცხალია, პოლიტიკური მოძრაობა ნეიტრალური საქართველოს ერთ-ერთი ლიდერი ვატო შაქარიშვილი, ოცნების ხელისუფლების მხარდამჭერი რეჟისორი გოგა ხაინდრავა, ექსპერტი ნოდარ კაპანაძე, პარტია ხალხის ძალის წევრი გურამ მაჭარაშვილი, ნაციონალური მოძრაობის ყოფილი წევრი ნიკა ობოლაძე და გირჩის წევრი ჰერმან საბო.