თეირანში ოსკარზე ნომინირებული ფილმის, It Was Just an Accident-ის თანასცენარისტი დააკავეს. მეჰდი მაჰმუდიანის დაპატიმრება იმ განცხადებაზე ხელმოწერას მოჰყვა, რომელიც ბოლოდროინდელი სისხლისღვრის გამო ირანის ლიდერს, ალი ხამენეის, გმობს.

It Was Just an Accident ოსკარის საუკეთესო საერთაშორისო სრუმლეტრაჟიანი ფილმისა და საუკეთესო სცენარის კატეგორიებშია წარდგენილი. 2026 წლის ოსკარის დაჯილდოებას 15 მარტს ვიხილავთ.

ფოტო: Amazon

ფილმი ირანელი ყოფილი პოლიტპატიმრების ჯგუფზე მოგვითხრობს. ისინი რთული არჩევანის წინაშე დგანან — იძიონ თუ არა შური იმ ადამიანზე, რომელიც, სავარაუდოდ, მათ ციხეში აწამებდა. მაჰმუდიანი სცენარისტთან ერთად ჟურნალისტი და ადამიანის უფლებათა აქტივისტია. მან ფილმის რეჟისორი ჯაფარ პანაჰი სწორედ საპატიმროში გაიცნო.

პანაჰიმ მაჰმუდიანი სიმშვიდის, სიკეთისა და პასუხისმგებლობის შეგრძნების გამო შეაქო. "როდესაც ახალი პატიმარი მოდიოდა, მეჰდი ყოველთვის ცდილობდა, პირველადი საჭიროების ნივთებით უზრუნველყო და დაემშვიდებინა. ციხეში ყველასთვის საყრდენი იყო, ადამიანი, რომელსაც ნებისმიერი პატიმარი ენდობოდა", — განაცხადა რეჟისორმა. მაჰმუდიანის გათავისუფლების შემდეგ პანაჰიმ ის სცენარზე სამუშაოდ მიიწვია.

მეჰდი მაჰმუდიანი

მეჰდი მაჰმუდიანი

ფოტო: Neon

დეკემბრის ბოლოს ირანში მძიმე ეკონომიკური კრიზისის გამო მასშტაბური საპროტესტო აქციები დაიწყო. რეჟიმმა დემონსტრაციებს ინტერნეტის გათიშვითა და მკაცრი რეპრესიებით უპასუხა.

ოფიციალური მონაცემებით, საპროტესტო აქციებს 3 117 ადამიანი ემსხვერპლა, თუმცა სამედიცინო სფეროს წარმომადგენლები ვარაუდობენ, რომ მსხვერპლის რეალური რაოდენობა შესაძლოა 30 ათასს აჭარბებდეს.