დაკავებული ირანელი პროტესტის მონაწილე ერფან სოლთანი, რომელიც, სიკვდილით არ დასჯილა, ფიზიკურად კარგ მდგომარეობაშია და ოჯახის წევრებთან შეხვედრა შეძლო. ამის შესახებ ინფორმაციას CNN ავრცელებს.

სომაიემ, 26 წლის სოლთანის ნათესავმა, რომელმაც უსაფრთხოების გამო უარი თქვა სრული სახელის გამხელაზე, კვირას CNN-ს განუცხადა, რომ ირანში მყოფი ოჯახისგან მიიღო ინფორმაცია, რომლის მიხედვითაც სოლთანი ცოცხალია და ოჯახთან შეხვედრაც მოახერხა.

"ყველას ვთხოვ, დაგვეხმაროს ერფანის თავისუფლების უზრუნველყოფაში," — განაცხადა სომაიემ ვიდეომიმართვაში.

ნორვეგიაში დაფუძნებულმა უფლებადამცველმა ორგანიზაციამ Hengaw-მაც კვირას დაადასტურა ოჯახის მოკლე შეხვედრა და დაამატა, რომ სოლთანი" კარგ ფიზიკურ მდგომარეობაშია". მანამდე მედიაში გავრცელდა ცნობა იმის შესახებ, რომ ახალგაზრდა კაცი ციხეში ცემით მოკლეს.

ცნობისთვის, 26 წლის სოლთანი პირველი ირანელი მომიტინგე იყო, რომელსაც მიმდინარე არეულობის დაწყების შემდეგ სიკვდილით დასჯა მიუსაჯეს.

უფლებადამცველი ჯგუფების ცნობით, სოლთანი, რომელიც ტანსაცმლის მაღაზიაში მუშაობდა, გასულ ხუთშაბათს თეირანის ჩრდილო-დასავლეთ ნაწილში საპროტესტო აქციაში მონაწილეობის შემდეგ დააკავეს და მისი სიკვდილით დასჯა ოთხშაბათს იყო დაგეგმილი.

შეგახსენებთ, ირანში დემონსტრაციები 2025 წლის 28 დეკემბერს დაიწყო. იმ დღეს, თეირანში მაღაზიების მეპატრონეებმა ეკონომიკური მდგომარეობის გაუარესების გამო პროტესტის ნიშნად თავიანთი ბიზნესები დახურეს. მოგვიანებით, საპროტესტო აქციებს სხვა მსხვილი ქალაქების მაცხოვრებლებიც შეუერთდნენ.

აშშ-ში დაფუძნებული ადამიანის უფლებათა დამცველი აქტივისტების საინფორმაციო სააგენტოს (HRANA) ცნობით, ირანში დეკემბრის ბოლოს ანტისამთავრობო დემონსტრაციების დაწყებიდან სულ მცირე 2 403 მომიტინგე დაიღუპა.

HRANA-ს წარმომადგენელმა CNN-ს დაუდასტურა, რომ მათ შორის 12 18 წლამდე ასაკის მომიტინგეა. HRANA-მ ასევე განაცხადა, რომ დეკემბრის ბოლოდან სულ მცირე 18 137 ადამიანი დააკავეს.

მეტი ირანში განვითარებულ მოვლენებზე: