სუს-ის ყოფილი უფროსის, გრიგოლ ლილუაშვილის ნათესავი, ვანში ქართული ოცნების ყოფილი დეპუტატი და კომპანია B.P. TRANS-ის მფლობელი ბიჭიკო პაიკიძე, რომელიც ინტერპოლის მიერ ე.წ. წითელი ცირკულარით იყო ძებნილი და რომელიც ესპანეთში 9 დეკემბერს დააკავეს, თავისუფალია. ამის შესახებ "ინტერპრესნიუსს" პაიკიძის ადვოკატმა, ირმა ჭკადუამ განუცხადა.

რა გახდა აღნიშნულის საფუძველი, ადვოკატი ამ ეტაპზე არ საუბრობს.

2025 წლის 24 სექტემბერს სახელმწიფო უსაფრთხოების სამსახურმა თაღლითობის და თაღლითობაში დახმარების საქმეზე B.P. TRANS-ის დირექტორი, კომპანიის თანამშრომელი და საზედამხედველო კომპანიის 3 თანამშრომელი დააკავა, ხოლო ყოფილ დირექტორ ბიჭიკო პაიკიძეზე ძებნა გამოაცხადა.

2 დღეში, 26 სექტემბერს, ბიჭიკო პაიკიძეს და მისი კომპანიის 5 თანამშრომელს აღმკვეთი ღონისძიების სახით პატიმრობა შეეფარდათ.

9 დეკემბერს კი ბიჭიკო პაიკიძე ესპანეთში დააკავეს.

მაშინ პაიკაძის ადვოკატი ირმა ჭკადუა აცხადებდა, რომ მისი დაცვის ქვეშ მყოფმა ქვეყანა ჯანმრთელობის პრობლემების გამო დატოვა და საერთოდ არ იყო ეს დაკავშირებული იმ სასამართლო დავასთან, რაც მის წინააღმდეგ მიმდინარეობს. პაიკიძეზე ძებნა წითელი ცირკულარით იყო გამოცხადებული.

რაც შეეხება საქმეს, სახელმწიფო უსაფრთხოების სამსახურის განცხადებით, 2021 წლის ივნისიდან 2022 წლის სექტემბრის ჩათვლით, ქუთაისი-ალპანა-მამისონის გზისა და ონის მუნიციპალიტეტის ტერიტორიაზე სტიქიით დაზიანებული მონაკვეთების ნაპირდამცავი სამუშაოების შესრულებისას, შპს B.P. TRANS-ის 100%-იანი წილის მფლობელმა ბიჭიკო პაიკიძემ ვალერიანე კვარაცხელიასთან, კომპანიის თანამშრომელ ი.ჭ.-სთან და ხელშეკრულების შესრულებაზე პასუხისმგებელ ზედამხედველ პირებთან — გ.კ.-ს, რ.ფ.-ს და ი.გ.-ს — ერთად, მოტყუებით მოიპოვა საქართველოს რეგიონული განვითარებისა და ინფრასტრუქტურის სამინისტროს კუთვნილი 4 184 249 ლარი.

ბიჭიკო პაიკიძეს დამატებით კიდევ ერთი ბრალი აქვს წარდგენილი — განსაკუთრებით დიდი ოდენობით გადასახადისათვის განზრახ თავის არიდება. ადვოკატ ირმა ჭკადუას განცხადებით, პაიკიძეს ბრალად ედება 2010-2012 წლებში საგადასახადოში დეკლარაციების არასწორად შევსება. ადვოკატის განმარტებით, ამ ბრალზე "საუბარი უხერხულია და ეს უხერხული დამთხვევაა, რადგან მაშინ "ნაციონალური მოძრაობის რეჟიმი მძვინვარებდა, ისინი ყველას აკავებდნენ და თუკი, ამ ტიპის დანაშაული იყო მომხდარი, პაიკიძეს აუცილებლად დააკავებდნენ".