საერთაშორისო გამჭვირვალობა — საქართველო (TI) სტატიას აქვეყნებს სადაც აღნიშნულია, რომ ადიგენში, სოფელ ბოლაჯურის მკვიდრმა, ჯაბა ჩხიტუნიძემ, რომელიც 2012 წელს, ძმასთან ერთად, საკუთარ სოფელში საკუთარ სახლში გახსნილ ქართული ოცნების ოფისს ხელმძღვანელობდა შესყიდვებით და სახელმწიფო პროგრამებით 16 მილიონ ლარამდე იხეირა.

"ადიგენში, სოფელ ბოლაჯურის მკვიდრს, ჯაბა ჩხიტუნიძეს, რომელიც 2012 წელს, ძმასთან ერთად, საკუთარ სოფელში ქართული ოცნების ოფისს ხელმძღვანელობდა (და ოფისიც საკუთარ სახლში ჰქონდათ გახსნილი), სახელმწიფოსგან ჯერ 29 ჰექტრამდე სახნავ-სათესი მიწა პირდაპირი პრივატიზების ფორმით მიიღო, შემდგომ სახელმწიფომ საწყობის ასაშენებლად — 497,961 ლარი, ნარგავებისთვის - 70,000-მდე ლარი და ოთხი შეღავათიანი აგროკრედიტი — 103,551 ლარის ოდენობით დაუფინანსა. ბოლოს, აქ მოყვანილი ხილ-ბოსტნეულით ძალოვანი სტრუქტურების მომარაგებაზე, ბოლო ორწელიწადნახევარში, ჯამში, 15,033,529 ლარის სახელმწიფო შესყიდვებიც მიიღო", — წერს TI.

საერთაშორისო გამჭვირვალობა — საქართველო აღნიშნავს, რომ 2012 წელს, როდესაც ქართული ოცნება ადიგენის მუნიციპალიტეტში ოფისისთვის ფართს ვერ ქირაობდა, მათიპირველი ოფისი სოფელ ბოლაჯურში, ძმების, ჯაბა და ბესიკ ჩხიტუნიძეების სახლში გაიხსნა.

TI-ს განმარტებით, ქართული ცონების ხელისუფლებაში მოსვლისთანავე ჯაბა ჩხიტუნიძე შსს დაცვის პოლიციის სამცხე-ჯავახეთის რეგიონული სამმართველოს უფროსის პოზიციაზე დაინიშნა, თუმცა ამ თანამდებობაზე დიდხანს არ დარჩენილა. 2016 წლიდან, ძმები, ჯაბა და ბესიკ ჩხიტუნიძეები ბიზნესში გააქტიურდნენ. მათ, 2023 წლამდე 5 სხვადასხვა კომპანია დააფუძნეს.

TI-ის ინფორმაციით, ჯამში, ჯაბა ჩხიტუნიძემ, 2023-2025 წლებში, 8 სახელმწიფო შესყიდვით ძალოვანი სტრუქტურების ხილითა და ბოსტნეულით მომარაგებისთვის 15,033,529 ლარი მიიღო. 2020-2023 წლებში აგროპროგრამის ფარგლებში 8 პროექტიდან კი სულ 671,511 ლარი დაერიცხა. 2020-2025 წლებში, სახელმწიფოსგან ჯაბა ჩხიტუნიძემ ჯამურად 15,705,040 ლარი მიიღო.