ყოფილი თავდაცვისა და შს მინისტრის, ბაჩო ახალაიას მეუღლემ ანა ნადარეიშვილმა ტვ პირველთან საუბრისას განაცხადა, რომ 3 კვირის წინ მისი მეუღლე პოლონეთში წასვლას გეგმავდა, მაგრამ ამის შესაძლებლობა არ მისცეს. მისივე თქმით, ბაჩო ახალაია დაკავებას ელოდებოდა.

"დაახლოებით 3 კვირის წინ, ბაჩო აპირებდა გაბრუნებას ისევ პოლონეთში. ჩვენ იქ წასულები ვიყავით, როგორც ემიგრანტები, ლუკმა-პურის საშოვნად, საზღვარზე არ გაუშვეს. მიზეზი არ განუმარტავთ. ბაჩოს თვითონაც ჰქონდა მოლოდინი, რომ დააკავებდნენ," — განაცხადა ნადარეიშვილმა.

რაც შეეხება ახალიას წინააღმდეგ წაყენებულ ბრალს, ნადარეიშვილმა ის "სრულ ბოდვად შეაფასა". მისი განცხადებით სუს-ის განცხადება, რომ ბაჩო ახალიამ 4 ოქტომბრის ორგანიზატორებთან სატელეფონო ზარები განახორციელა, აბსურდია, რადგან უწყებამ მისი ნომერი არ იცოდა.

"ბოდვაა სრული. ბაჩო რომ დაიბარეს, მაშინ ამ ხმის ჩანაწერის ნიმუშზე მე დამირეკეს და ასე დაიბარეს — მაშინ ვუთხარი, მე რატომ მირეკავთ? და მიპასუხეს, რომ ბაჩოს ტელეფონი არ იცოდნენ. ბაჩოს ტელეფონიც არ აქვთ დადგენილი და როგორი ბოდვაა, საერთოდ სახლში ვინ ვცხოვრობდით, ისიც არ აქვთ დადგენილი.

[...] ესენი არიან რუსები. ჩვენ კოლაბორაციონისტები არ ვართ, არ ვლაპარაკობთ მტრებთან. დაახლოებით 4 საათი იქნებოდა, ჩემს ნომერზე რომ დარეკეს. ის გამომძიებელი ქალბატონი იყო, ვინც მე მანამდე დამიბარა და დამკითხა. მითხრა, რომ დამატებით ჰქონდა კითხვები და მიბარებდა მოწმის სახით. ასევე იბარებდა ბაჩოსაც და ზვიად გაგუასაც — ჩვენი ოჯახის ახლობელს, რომელიც ჩვენთან ცხოვრობს.

ვუთხარი, რომ მოსამართლესთან გამოკითხვაზე მივიდოდით და კი ბატონო, დავაფიქსირებ ოქმში და დაგიკავშირდებითო. ზუსტად ნახევარ საათში, დაახლოებით, 30 ნიღბიანი და ავტომატიანი სამართალდამცავი შემოცვივდა. იდგნენ ავტომატებით. ტელეფონი ჩავრთე, პირდაპირი ეთერი რომ ჩამერთო. საოცარი სანახაობა იყო, მაგრამ ეგრევე მომიშვირეს ავტომატები — დააგდე ტელეფონიო, ნივთმტკიცებაა და არ გაქვს უფლება გადაღებისო," — განაცხადა ნადარეიშვილმა.

მისი განცხადებით, ოჯახის ახლობელს, ზვიად გაგუას ბაჩო ახალიას წინააღმდეგ ჩვენების მიცემა აიძულეს და აშინებდნენ, რომ ახალაიასთან ერთად, მის მეუღლესაც გაასამართლებდნენ.

უკნიდან მომადგა ქალბატონი გამომძიებელი და მითხრა, თქვენც დაკავებული ხართო და დაიწყეს ჩემი ოქმის შედგენა. მე რომ გამიყვანეს, მერე გაიყვანეს ბაჩო და შემდეგ წაუყვანიათ ზვიად გაგუაც. სუს-ში დაკითხვაზე უთხრეს, მიეცი ბაჩოს წინააღმდეგ ჩვენება, დაადასტურე, რომ კონტაქტი ჰქონდა და იყო ორგანიზატორი [4 ოქტომბრის აქციის] და ანის გამოვუშვებთო, თუ არადა, ორივე დაჭერილია და ბავშვები დედ-მამის გარეშე დარჩებიანო. შემდეგ დააბრუნეს სახლში," — თქვა ნადარეიშვილმა.

შეგახსენებთ, სახელმწიფო უსაფრთხოების სამსახურის ცნობით, 4 ოქტომბრის საქმეზე თავდაცვის ყოფილი მინისტრი ბაჩო ახალაია დააკავეს. უწყების მიერ გავრცელებულ განცხადებაში ნათქვამია, რომ ბაჩო ახალაიას ცოლის ანა ნადარეიშვილის აიპი მისამართებსა და ბრალდებული ორგანიზატორების ინტერნეტაპლიკაციებს შორის 343 ინტერნეტსესია ფიქსირდება. უწყების ცნობით, ბაჩო ახალაიასთან ერთად დააკავეს მისი მეუღლეც, თუმცა, ანა ნადარეიშვილი შემდეგ გაათავისუფლეს.