თავდაცვის ყოფილი მინისტრის, ბაჩო ახალაიას ცოლი ანი ნადარეიშვილი სახელმწიფო უსაფრთხოების სამსახურში დაიბარეს. ამის შესახებ მან სოციალურ ქსელში დაწერა.

"მეც დამიბარეს, ოღონდ სუს-ში", — წერს ანი ნადარეიშვილი სოციალურ ქსელში.

4 ოქტომბერს, თბილისში განვითარებულ მოვლენებთან დაკავშირებით დაწყებული სისხლის სამართლის საქმის გამოძიების ფარგლებში, 2025 წლის 10 ოქტომბერს, 13:00 საათზე, მოწმის სახით გამოკითხვისა და ხმის ნიმუშის აღების მიზნით შსს-ს ცენტრალური კრიმინალური პოლიციის დეპარტამენტში დაბარებული იყო ბაჩო ახალაიაც. გამოკითხვა ჯერ არ დასრულებულა.

დღევანდელ ბრიფინგზე ოცნების პარლამენტის თავმჯდომარემ, შალვა პაპუაშვილმა განაცხადა, რომ "ვხედავთ ბაჩო ახალაიას მეუღლეს, რომელიც სოცქსელში აქტიურია. ახალაია თვითონ არ ჩანს, მაგრამ არავის ეპარება ეჭვი, რომ ის იმ სათქმელს აჟღერებს, რომელიც ბაჩო ახალაიას აქვს".

მისივე თქმით, "თუ რა საკითხებში და როგორ იყო ის [ბაჩო ახალაია] ჩართული, გამოძიება ამიტომაც არის. სამართალდამცავი სტრუქტურები ცდილობს, რომ ამაში გაერკვნენ და ყველა დეტალი დადგინდეს. პარლამენტის მოლოდინია, რომ მიაკვლიონ ყველა მოძალადეს, მიაკვლიონ ყველა ორგანიზატორს, მიაკვლიონ ყველა დამფინანსებელს, გარე წამხალისებელს და ყველას მიმართ შესაბამისი პასუხისმგებლობა დააყენონ", — განაცხადა შალვა პაპუაშვილმა.