რობერტ ფიცომ დღეს, 23 იანვარს, ქვეყანაში "სახელმწიფო გადატრიალების" საშიშროების გამო, უსაფრთხოების საბჭოს საგანგებო სხდომა მოიწვია რომლის შესახებაც, ფიცოს თქმით, სპეცსამსახურებმა აცნობეს. სლოვაკეთის პრემიერმინისტრის გადაწყვეტილების შესახებ ინფორმაციას გერმანული მაუწყებელი DW ავრცელებს.

ფოცოს განმარტებით, არსებობს კანონიერი ხელისუფლების დამხობის გეგმა, რომელიც სხვა ქვეყნებში გამოცდილი მოდელით, ითვალისწინებს ქუჩის საპროტესტო აქციებს და ადმინისტრაციულ შენობებში შეჭრას.

საჯაროდ რაიმე დეტალების და მტკიცებულებების მოყვანის გარეშე, ფიცომ აღნიშნა, რომ სლოვაკეთში არსებობს სხვადასხვა წყაროდან დაფინანსებული ექსპერტების ჯგუფი, რომელიც ანალოგიურ პროცესებში მონაწილეობდა საქართველოსა და უკრაინაში(მაიდანი).

22 იანვარს, ფიცოს მთავრობისთვის უნდობლობის გამოცხადების ინიციატივით, ოპოზიციურმა პარტიებმა "პროგრესულმა სლოვაკეთმა", "თავისუფლება და სოლიდარობამ" და "ქრისტიან-დემოკრატიულმა მოძრაობამ" პარლამენტს ხელახლა მიმართეს. კენჭისყრა შვიდი დღის განმავლობაში უნდა ჩატარდეს. სამ ოპოზიციურ პარტიას სლოვაკეთის 150-წევრიან პარლამენტში 55 დეპუტატი ჰყავს.

ოპოზიციონერების მხრიდან ფოცოსთვის უნდობლობის გამოცხადების საკითხი პარლამენტის სხდომაზე 21 იანვარსაც უნდა განეხილათ, თუმცა ოპოზიციამ წინადადება გაიწვია, ხოლო სხდომა პროტესტის ნიშნად დატოვა მას შემდეგ, რაც სპიკერმა ფიცოს მიმართვა დააკმაყოფილა და სხდომის დახურული რეჟიმით ჩატარება გადაწყვიტა.

სლოვაკეთის პრემიერმინისტრმა მოგვიანებით სხდომის დახურვის მოთხოვნა იმით ახსნა, რომ დეპუტატებისთვის უნდა წარედგინა სპეცსამსახურების საიდუმლო მოხსენება სლოვაკეთში მოსალოდნელი დესტაბილიზაციის შესახებ.

ცნობისთვის, ოპოზიცია სლოვაკეთის პრემიერმინისტრს ქვეყნის იზოლაციის გამომწვევ ანტიდასავლურ საგარეო კურსსა და რუსეთის პრეზიდენტ ვლადიმერ პუტინთან თანამშრომლობაში ადანაშაულებს. ისინი აცხადებენ, რომ არ დაუშვებენ ქვეყნის აღმოსავლეთისკენ შეტრიალებას.

რობერტ ფიცო, უნგრეთის პრემიერმინისტრ, ვიქტორ ორბანთან ერთად დასავლეთს ხშირად აკრიტიკებს, ისევე როგორც მის პოლიტიკას რუსეთისადმი და უკრაინის მხარდაჭერას.