უკრაინული მედიის ცნობით, სლოვაკეთის პრემიერ-მინისტრის, რობერტ ფიცოს განცხადებით, მისი მთავრობა განიხილავს ზომებს უკრაინის მიერ რუსული გაზის ტრანზიტის შეწყვეტის საპასუხოდ.

ფიცოს თქმით, უკრაინის გავლით რუსული გაზის ტრანზიტის შეწყვეტა ვოლოდიმირ ზელენსკის დივერსიაა და ამის გამო მისი ქვეყნის ზარალი წელიწადში 500 მილიონ ევროს შეადგენს. მან დაადასტურა, რომ სლოვაკეთის მთავრობის წარმომადგენლები მომავალ სამშაბათს ბრიუსელში ტრანზიტის შეჩერების საკითხს განიხილავენ.

სლოვაკეთის პრემიერი ტრანზიტის აღდგენას ან 500 მილიონი ევროს კომპენსაციას ითხოვს.

"პარტია Smer-SD-ის სახელით ვაცხადებ, რომ მზად ვართ კოალიციაში მოლაპარაკება ვაწარმოოთ და შევთანხმდეთ ელექტროენერგიის მიწოდების შეწყვეტაზე და სლოვაკეთის ტერიტორიაზე მყოფი უკრაინის მოქალაქეების მხარდაჭერის მნიშვნელოვან შემცირებაზე", — აღნიშნა ფიცომ.

1-ლი იანვრიდან უკრაინამ საკუთარი ტერიტორიის გავლით რუსული გაზის ევროპაში ტრანზიტი შეწყვიტა.