11-მომხრე, 2 — წინააღმდეგი — ამ შედეგით დასრულდა კენჭისყრა, რომელსაც ოცნების პარლამენტში 2024 წლის ნოემბერ-დეკემბერში საპროტესტო აქციებზე ქიმიური იარაღის შესაძლო გამოყენების შესახებ საგამოძიებო კომისიის შექმნის საკითხი უნდა გადაეწყვიტა.

პარტია "გახარია საქართველოსთვის" ერთ-ერთმა ლიდერმა, გიგა ფარულავამ პარლამენტში სიტყვით გამოსვლისას განაცხადა, რომ "აუცილებელია პასუხი გაეცეს კითხვებს, სამართალდამცავი ორგანოების მხრიდან ადგილი ხომ არ ჰქონდა ისეთი აქტიური სპეციალური საშუალებების გამოყენებას, რომელიც დაკავშირებულია გაუმართლებელ რისკთან, ან იკრძალება საქართველოს კანონმდებლობით, ასევე რამდენად პროპორციულად და შესაბამისი ინტენსივობით იქნა გამოყენებული ისინი".

მისივე თქმით, დროებითი საგამოძიებო კომისიის შექმნა მიზნად ისახავდა — "ერთის მხრივ: უმნიშვნელოვანესი კონსტიტუციური უფლების, ადამიანის სიცოცხლისა და ჯანმრთელობის, როგორც სახელმწიფოს უმაღლესი დაცვითი ღირებულების ზედამხედველობის მიზნებს და შეკრება/მანიფესტაციის განხორციელების შეზღუდვის კანონიერების შესწავლის ამოცანებს. მეორეს მხრივ, საქართველოში გამართული მასობრივი შეკრებებისა და მანიფესტაციების დროს სამართალდამცავი ორგანოების თანამდებობის პირთა/თანამშრომელთა მიერ სპეციალური საშუალებების გამოყენების დროს უფლებამოსილების შესაძლო გადამეტების ფაქტების შესწავლის საკითხებს.