პარტია გახარია საქართველოსთვის წევრი, გიორგი შარაშიძე "ტვ პირველთან" საუბრისას ამბობს, რომ "საგამოძიებო კომისიაზე უარი ნიშნავს, რომ ოცნების 89-ვე დეპუტატი იზიარებს პასუხისმგებლობას იმ შესაძლო დანაშაულზე, რაც ჩაიდინა ოცნების რეჟიმმა ნოემბერ-დეკემბერში".

"ქართული ოცნება ამ უარით ამბობს იმას, რომ მისი 89-ვე დეპუტატი, რომელიც დღეს "ოცნებას" წარმოადგენს პარლამენტში, იზიარებს პასუხისმგებლობას იმ შესაძლო დანაშაულზე, რაც ჩაიდინა "ოცნების" რეჟიმმა ნოემბერ-დეკემბერში. გარდა იმისა, რომ აქ საუბარია შესაძლო ქიმიური ნივთიერების გამოყენებაზე, თავად ფაქტი ნებისმიერი სხვა დამატებითი ნივთიერების შერევის, ეს არის უმძიმესი დანაშაული, რომელიც თავისი სიმძიმით უტოლდება ადამიანის წამებას და არაადამიანურ მოპყრობას, ამიტომ აუცილებელია ამ საქმის გამოძიება პარლამენტში, ყველა იმ შესაბამისი თანამდებობის პირის დაბარება — დაწყებული შს მინისტრით, დამთავრებული პრემიერ-მინისტრით, ვისაც პირდაპირი ან ირიბი შემხებლობა შეიძლება ჰქონოდა ამ საქმესთან. სხვა შემთხვევაში, ჩვენ გვექნება რეალობა, როდესაც მუდმივად იქნება საფრთხე ხელისუფლების მხრიდან არაპროპორციული და არაკანონიერი ძალის გამოყენების", — აცხადებს გიორგი შარაშიძე.

ოცნების გუნდში აცხადებენ, რომ გამოძიებამ ყველა კითხვას გასცა პასუხი და დამატებით საგამოძიებო კომისიის შექმნის საჭიროება არ არსებობს. ოცნების პარლამენტის თავმჯდომარის, შალვა პაპუაშვილის თქმით, "საქართველოს წინააღმდეგ საძაგელ დეზინფორმაციას არ უნდა მივცეთ ტრიბუნა".

"მას შემდეგ, რაც ჩაიფუშა ჰიბრიდული ოპერაცია საქართველოს და ქართველი ხალხის წინააღმდეგ, მცდელობა აქვთ, ხელოვნურ სუნთქვაზე ამყოფონ ეს თემა. არავის მივცემთ შესაძლებლობას, ამ საძაგელ დეზინფორმაციას ჰქონდეს საპარლამენტო ტრიბუნა“, – განაცხადა პაპუაშვილმა.

...პრემიერმინისტრმაც გასცა ამას პასუხი. ყველა კითხვას გაეცა ღია პასუხი, გამოძიება იყო სწრაფი, ეფექტიანი და გამჭვირვალე. რომელიმე რელევანტურ საერთაშორისო ინსტიტუტს რაიმე კითხვა თუ აქვს, საქართველოს ხელისუფლება მზად არის, ნებისმიერ საკითხზე პასუხი გასცეს", — განაცხადა შალვა პაპუაშვილმა.